AQSh prezıdenti Donald Tramp Reseımen kelissózderde jetistikke jetkenin málimdegennen keıin, 24 sáýirge qaraǵan túni Reseı áskeri Ýkraına qalalaryna shabýyl jasady. Bul týraly DW saıty jazdy, dep habarlaıdy “Adyrna” ulttyq portaly.
«Kıevke shabýyl jasalýda. Ártúrli baǵyttan ballıstıkalyq zymyrandarmen soqqylar jasaldy. Sondaı-aq, Reseıdiń strategııalyq avıaııasynan zymyran ushyrýlar tirkeldi», – dep jazdy Kıev áskerı ákimshiliginiń basshysy Tımýr Tkachenko Telegram-arnasynda.
Onyń aıtýynsha, Ýkraına astanasynyń úsh aýdanynda – Goloseev, Shevchenko jáne Svıatoshında keminde toǵyz órt tirkelgen. Tkachenko reseılik shabýyl qaýpi aldaǵy birneshe saǵatta da saqtalatynyn eskertti.
«Azamattyq ınfraqurylymǵa soqqy jasaldy. Jaǵdaı óte kúrdeli. Orys áleminiń tynysy tolyq kórinip tur», – dedi ol.
Kıev meri Vıtalıı Klıchko Telegram-arnasynda eki adamnyń qaza tapqanyn, taǵy 54 adamnyń jaralanǵanyn habarlady. Onyń ishinde 38 adam (6 bala) aýrýhanaǵa jetkizilgen.
Keıinirek Ýkraına Tótenshe jaǵdaılar memlekettik qyzmeti shabýyl saldarynan 9 adamnyń qaza tapqanyn, 63 adamnyń jaralanǵanyn, onyń ishinde 42 adam (6 bala) aýrýhanaǵa túskenin habarlady.
Reseıdiń kelesi shabýyly Harkov qalasyna baǵyttaldy. Qala meri Igor Terehov Telegram-arnasynda alǵashqy aqparat boıynsha qala jeti zymyrandyq soqqyǵa ushyraǵanyn aıtty.
«Shabýyl saldary naqtylanyp jatyr. Ázirge jaralanǵandar týraly aqparat joq», – dedi ol.
Keıinirek Terehov Harkovtiń Novobavar aýdanynda bir soqqydan keıin kópqabatty úılerdiń terezeleri synǵanyn, sondaı-aq Osnovıan aýdanynda jeke turǵyn úılerdiń búlingenin habarlady. Ol raketalyq shabýyldan keıin qala joıǵysh drondardyń jappaı shabýylyna ushyraǵanyn aıtty.
