440 mıllıon teńgege jóndeýden ótken mektep edeniniń tesigin muǵalimder jamap jatyr

3061
Adyrna.kz Telegram

Munaıly ólke Atyraýda byltyr 440 mıllıon teńgege jóndeýden ótken mekteptiń edenin muǵalimder ózderi jamap jatyr, dep habarlaıdy "Adyrna" ulttyq portaly "Informbıýro" jańalyqtar baǵdarlamasyna silteme jasap. 

Qazynanyń qarjysy ıgerilgen. Bitken jumysty jaýaptylar qabyldap alǵan. Alaıda mıllıondap qarjy bólinse de sapa syn kótermeıdi. Bilim ordasynyń esik-terezesi qańyrap, edeni shuryq-tesik kúıinde qalǵan. Atyraý qalasyndaǵy Maqash Bekmuhanbetov atyndaǵy mekteptiń máselesin qyzmetkeriniń biri áleýmettik jelige salǵan.

Tipti 440 mıllıon teńgege tolyqtaı kúrdeli jóndeýden ótken mekteptiń edeniniń tesikterin qyzmetkerler ózderi jamap jatyr dep, aıtqanyna dálel bolatyndaı sýretterdi de jarııalapty. Muny mekteptiń muǵalimderiniń biri rastady. Onyń sózinshe mıllıondap qarjy bólingenimen sapasy syn kótermeıdi.

“Eriksiz májbúrli túrde. Syrttaǵy bitpeı qalǵan jumystyń barlyǵyn muǵalimder jasady. Jer-jerde boqtyq qaldy.Sonyń barlyǵyn qyzmetkerler jasady. Jigitter jaǵyn shaqyrtyp jasatty”, – deıdi M.Bekmuhanbetov atyndaǵy orta mektep muǵalimi Raısa Jýmabaeva.

Al mektep dırektorynyń sózinshe jóndeý jumysyn jasaýǵa muǵalimniń ózi usynys jasapty.

“Dene shynyqtyrý muǵalimi usynys jasady. Eden kórikti bolýy úshin, odan ári jaqsartý maqsatynda bir-eki sańylaý boldy sony apaı bitep tastasaq qaıtedi dep óz erikterimen 2-3 jerdi bitedi”, - deıdi M.Bekmuhanbetov atyndaǵy orta mektep dırektory Aınur Salyqova.

Atyraý oblystyq Bilim berý basqarmasy ókilderiniń sózinshe qazir mektep dırektoryna tártiptik shara qoldanylǵan.

 

Pikirler