Atyraýda avtobýstarǵa da Ashyq júıesi engizildi. Búginnen bastap qoǵamdyq kólikke jolaýshylar QR-kodty skanerlegen soń ǵana mine alady. Bul týraly “Adyrna” ulttyq portaly KTK arnasyna siltep habarlaıdy.
“Qyzyl" nemese "sary" mártebe shyqsa, avtobýsqa otyrýǵa ruqsat joq. Ózi naýqas nemese aýrý adammen baılanysta bola tura, karantın tártibin buzyp qoǵamdyq kólikpen qala sharlamaq bolǵandar anyqtalsa, tıisti shara qoldanylady.
Bul sheshimdi Atyraý qalasynyń ákimdigi qabyldaǵan. Óıtkeni qazir Atyraý epıdahýaly ýshyqqan "qoıý qyzyl" beldeýdegi 4 qalanyń qatarynda. Munda apta basynan beri basqa da karantın talaptary kúsheıtilip jatyr.
