Bügın Memleket jäne qoǧam qairatkerı Tölen Toqtasynovtyŋ janazasy tuǧan ölkesı Semeide öttı, dep habarlaidy “Adyrna” ūlttyq portaly.
Aqtyq saparǧa şyǧaryp salu räsımıne Abai oblysynyŋ äkımı Nūrlan Ūranqaev, Parlament deputaty Ermūrat Bapi jäne üzeŋgıles dostary qatysyp, Tölen Toqtasynov jaiynda estelıkterımen bölıstı.
Sondai-aq, Ermūrat Bapi Parlament Mäjılısınıŋ töraǧasy Erlan Qoşanovtyŋ köŋıl aitu jedel hatyn oqyp berdı.
«Belgılı saiasatker, memleket jäne qoǧam qairatkerı Tölen Mūhamediūly Toqtasynovtyŋ qaitys boluyna bailanysty otbasyna, tuǧan-tuystaryna orny tolmas auyr qaiǧyǧa ortaqtasyp, köŋıl aitamyn. Tölen Mūhamediūly arnaiy memlekettık müddenı biık qoiyp, el üşın aianbai eŋbek ettı. Azamattyq ūstanymyna berık bolyp, ädılettılıktıŋ jolynan taimady. Qoǧamdaǧy özektı mäselelerdı batyl köterıp, baitaq otanymyzdyŋ damuyna üles qosty. Mäjılıs deputaty retınde bastamaşylyq tanytyp, zaŋnama salsyn jetıldıruge zor eŋbek sıŋırdı. Önegelı ömır jolymen artynda öşpes ız qaldyrdy. Körnektı tūlǧanyŋ jarqyn beinesı, adamgerşılık bolmysy men ūlaǧatty ısterı jaqyndary men halqymyzdyŋ jüregınde mäŋgısaqtalady. Marqūmnyŋ jatqan jerı jaily, topyraǧy torqa bolsyn», delıngen QR Parlament Mäjılısınıŋ töraǧasy Erlan Qoşanovtyŋ hatynda.
«JEKE DARA BİLIKKE EŊ ALǦAŞ TŪRǦAN ADAM»
“Tölen Toqtasynovty jas ūrpaq köp bıle bermes. Bıraq Qazaqstannyŋ täuelsızdıgın qalyptastyru jolyndaǧy elge qyzmet etken myqty qairatkerlerdıŋ bırı boldy. Parlamenttıŋ ekınşı şaqyrylymynda deputat boldy. Qazaqstannyŋ parlamentarizmı tarihynda avtoritarizmge, jeke dara bilıkke eŋ alǧaş ret tūrǧan adam. Qazaqstan parlamentınde elımızdegı eŋ yqpaldy äulettıŋ qysystyǧyna qatysty resmi mälımdeme jasaǧan alǧaşqy deputat boldy. Tölen Toqtasynov sekıldı 2019 jylǧa deiın, tıptı, 2022 jylǧa deiın parlamentte eldegı avtoritarizmdı aiyptaǧan tūlǧa bolǧan joq. Ras, baspasözde aityldy, jazyldy. Bıraq bilık mınberınen aitylǧan joq. İmanǧali Tasmaǧambetovtyŋ ükımetı jer satuǧa rūqsat beretın zaŋ jobasyn parlamentke ūsynǧan kezde jetı deputat qarsy şyqty. Osy jeteudıŋ bırı –Tölen Toqtasynov edı. 1990-jyldardyŋ aiaǧy men 2000 jyldardyŋ basynda «Qazaqgeit» degen şyrǧalaŋ paida boldy. Nūrsūltan Nazarbaevtyŋ Şveisariiadaǧy şotynda para retınde alynǧan 98 mln dollardyŋ jatqany turaly mälımdeme jasaǧan üş deputattyŋ bırı de Tölen edı. Osydan-aq, onyŋ elge şyn peiılımen qyzmet etken qairatker ekenın aŋǧaruǧa bolady. Bız osyndai azamattan aiyrylyp otyrmyz”, - dedı Ermūrat Bäpi.«SŪM BİLIKKE BETKE AITUDAN TARTYNBAǦAN»
Sonymen qatar, belgılı käsıpker Ahmetbek Nūrsila jaqyn dosy Tölenge arnaǧan öleŋ joldaryn aitty. «Baqūl bol, Tölen dosym aŋqyldaǧan, Öte şyqty ömırıŋ jarqyldaǧan. San qily, şyrǧalaŋdy myna ömırde Jan edıŋ adam köŋılın qaldyrmaǧan. Mınezıŋ körkem edı aŋqyldaǧan, Meiırıŋ būlaq edı sarqylmaǧan. Aq pen qara aiqasqan myna ömırde Aryŋ qaldy jarqyrap altyndaǧan. Sūm bilıkke betke aitudan tartynbaǧan, Kamikadze deputat, alǧan baǧaŋ Nūrsūltan men Rahattyŋ betıne aitqan Dauysyŋ qaldy qūlaqta saŋqyldaǧan”, dedı Ahmetbek Nūrsila.Belgılı azamattyŋ aqtyq sapary üşın qaraqūrym halyq Abai atyndaǧy oblystyq drama teatryna jinaldy.
Jinalǧandardyŋ arasynda “Bır kezdegı oppozisiianyŋ belsendı müşesın teatrdyŋ törınen şyǧaryp salyp, şaraǧa oblys äkımınıŋ qatysuy - Jaŋa Qazaqstannyŋ lebın sezdıredı eken” dep pıkır bıldıruşıler de boldy.
Tölen Toqtasynov 1962 jyly 9 qazanda Semeide düniege kelgen.
Almaty säulet-qūrylys institutyn 1989 jyly injener-tehnolog-qūrylysşy mamandyǧy boiynşa bıtırgen.
1991 jyldan – «Aiqas» öndırıstık firmasynyŋ direktory, 1995 jyldan – «ALEL» qarjy-investisiialyq altyn öŋdeitın kompaniiasynyŋ bas direktory – «Kapoligraf» AQ prezidentı, 1997 jyldan -«Kapoligraf» AQ jäne «ALEL» AQ Direktorlarynyŋ keŋesınıŋ töraǧasy boldy.
2000 jyldyŋ qyrküiegınen - QR Parlamentı Mäjılısınıŋ deputaty (Şyǧys Qazaqstan oblysynyŋ №19 Batys sailau okrugy), Ekologiia jäne tabiǧatty paidalanu mäselelerı jönındegı komitettıŋ müşesı, «Ekologiia» deputattyq tobynyŋ jetekşısı, 2004 jyldan Qazaqstan Kompartiiasy OK hatşysy qyzmetın atqardy.
Sondai-aq, Qazaqstan mäjılısı 2-şı şaqyrylymynyŋ deputaty ärı 2001 jyly qūrylǧan «Qazaqstannyŋ demokratiialyq taŋdauy» qozǧalysynyŋ qūryltaişylarynyŋ bırı boldy.
Keiın Qazaqstannyŋ kompartiiasynyŋ (2015 jyly Almaty sotynyŋ şeşımımen jabylǧan) ekınşı hatşysy boldy. 2005 jyldyŋ aiaǧynda kezekten tys prezident sailauy kezınde Jarmahan Tūiaqbaidyŋ sailaualdy ştabynyŋ jetekşısı boldy..
Tölen Toqtasynov erteŋ 62 jasqa toluşy edı.
