Otbasy kúni qarsańynda Astanada «Mereıli otbasy» ulttyq baıqaýy qorytyndylanyp, jeńimpazdar marapattaldy. Saltanatty is-sharaǵa Qazaqstannyń barlyq aımaǵynan óńirlik kezeńderde jeńiske jetken otbasylar qatysty.
Memleket basshysy Qasym-Jomart Kemeluly Toqaev baıqaý jeńimpazdaryna arnaıy sálemin joldap, quttyqtaý hatyn jiberdi. Prezıdenttiń jyly lebizin Senat tóraǵasy Máýlen Áshimbaev oqyp berdi.
Memleket basshysy óziniń quttyqtaý hatynda Ádiletti Qazaqstan qalyptastyrý jolynda otbasy ınstıtýtyn qoldaý mańyzdy qadam ekenin atap ótken. Sondyqtan elimizde bul baǵytqa basa mán berilip, júıeli sharalar qabyldanyp jatqany da aıtyldy.
«Mereıli otbasy» baıqaýy – ulttyq qundylyqtardy jańǵyrtýǵa jol ashatyn, ózindik dástúri bar biregeı joba. Halqymyzdyń asyl qasıetterin óskeleń urpaqtyń boıyna sińirý – bárimizge ortaq mindet. Osy oraıda ár otbasy aıryqsha ról atqarady. Elimizde adal eńbegimen kópke úlgi bolyp júrgen ónegeli áýletter az emes. Búgingi saltanatty kesh – sonyń aıqyn dáleli. Bul baıqaýdaǵy árbir otbasynyń jeńisin birligi jarasqan jurtymyzdyń mereıli jetistigi dep baǵalaýǵa bolady», – delingen Prezıdenttiń quttyqtaý hatynda.
Óz sózinde Máýlen Áshimbaev Memleket basshysy ultymyzdyń jańa kelbetin qalyptastyrýda otbasy ınstıtýty sheshýshi ról atqaratynyna únemi nazar aýdaryp kele jatqanyn aıtty. Palata Spıkeri atap ótkendeı, Prezıdent Ulttyq quryltaıdyń otyrysynda jarııalaǵan «Adal adam – Adal eńbek – Adal tabys» tujyrymy el ıdeologııasynyń irgetasy retinde aıryqsha mańyzǵa ıe.
«Prezıdentimiz Qasym-Jomart Kemeluly Toqaev otbasynyń áleýetin kóterýge, ana men balany qorǵaýǵa, qoǵamda durys qundylyqtardy dáripteýge únemi basa mán berip keledi. Memleket basshysy óziniń Joldaýynda da osy máselelerge nazar aýdaryp, azamattarymyzdyń ál-aýqatyn arttyrýǵa arnalǵan kezekti áleýmettik bastamalar keshenin jarııalady. Munyń bári elimizdegi ár otbasynyń ómirine oń yqpalyn tıgizetini anyq», – dep, Máýlen Áshimbaev Palatanyń Memleket basshysy júktegen mindetterdi iske asyrý aıasynda atqaryp kele jatqan zańnamalyq qyzmetine toqtalyp ótti.
Sondaı-aq bıyl iske qosylǵan «Ulttyq qor – balalarǵa» atty aýqymdy joba jóninde jáne sonyń aıasynda eldegi 7 mıllıon balanyń qamtylǵany sóz boldy. Otbasylardy qoldaýǵa jáne áıelder men balalar quqyǵyn qorǵaýǵa arnalǵan basqa da sharalardyń mańyzy aıtyldy.
Senat tóraǵasy baıqaý jeńimpazdaryn quttyqtaı kele, adamgershilik jáne otbasylyq qundylyqtardy dáripteý isinde «Mereıli otbasy» baıqaýy eleýli ról atqaratynyn aıtty.
Jalpy jobaǵa bir salada uzaq jyldar boıy jumys istep kele jatqan eńbek dınastııalary, shyǵarmashyl jáne bala asyrap alǵan otbasylar, volonterler men meenattar qatysyp jatyr. Bıyl baıqaý 11-shi ret ótkizilip otyr. Baıqaýdyń óńirlik kezeńine qatysýǵa Qazaqstannyń barlyq aımaqtarynan 3 369 ótinim túskenin atap ótken jón. Baıqaý jeńimpazdaryn Mádenıet jáne aqparat mınıstri Aıda Balaeva quttyqtady.
«Qazaqstandaǵy ár otbasy – elimizdiń tiregi, júregi. Sizderdiń baıqaýǵa belsendi qatysyp, jeńimpaz atanyp otyrǵandaryńyz men úshin qýanysh. Ár otbasy ulttyq qundylyqtardy boıyna sińirip otyrǵan balalarynyń qyzyǵyn kóre bersin!» – dedi Aıda Balaeva.
❇️«Mereıli otbasy – 2024» baıqaýynda Aqmola oblysynan kelgen – Kóńbaılar, Almaty oblysynan – Janbaevtar, Aqtóbe oblysynan – Nurbaevtar, Abaı oblysynan Smaǵulovtar otbasy laýreat atandy. Sondaı-aq respýblıkalyq mańyzy bar Astana, Almaty jáne Shymkent qalalarynyń jeńimpazdary – Ádilbaevtar, Qapyshevtar jáne Sydyqovtar otbasylary. Odan bólek, Batys Qazaqstan oblysynan – Hamzınder otbasy, Qaraǵandy oblysynan – Halabaevtar, Soltústik Qazaqstannan – Hasenovter, Atyraýdan – Syrálıevter, Qostanaıdan – Shýkýrovtar, Jambyldan Tańatarovtar, Jetisýdan – Álekeevter, Pavlodardan – Temirovter, Ulytaýdan – Qydyrpatshaevtar, Qyzylordadan – Bektaevtar, Mańǵystaýdan – Muqyrbaevtar, Túrkistannan – Meńlibaevtar jáne Shyǵys Qazaqstan oblysynan Qydyrhanovtar otbasy úzdik dep tanyldy.
