Taraz qalasynyń ákimi Baqytjan Orynbekov «Báıterek» (13) shaǵyn aýdanyndaǵy №14, 39 kópqabatty turǵyn úılerge at basyn burdy.
Munda qazir jańǵyrtý jumystary júrgizilýde. Aıtalyq, №14 kóppáterli turǵyn úıdiń árleý, paraped jáne №39 úıdiń shatyryn aǵymdaǵy jóndeý úshin jobalyq-smetalyq qujattary ázirlenip, demontajdyq jáne jańǵyrtý jumystary qolǵa alynǵan.
Alaıda, shahar basshysy atqarylǵan jumystarǵa kóńili tolmaıtynyn jasyrmady. Sebebi, qurylys sapasy tómen ári kóptegen kemshilikke jol berilgen.
Óz kezeginde Baqytjan Ámirbekuly olqylyqtyń ornyn dereý toltyryp, jumystardy joǵary deńgeıde oryndaý qajettigin basa aıtty.
Sonymen qatar qala ákimi Tóle bı dańǵyly, №11 mekenjaıynda ornalasqan jataqhanany qaıta jańǵyrtý jumystaryn kórdi.
Atalǵan turǵynjaıdyń kúrdeli jóndeý jumysyna qatysty JSQ ázirlenip, ishki kúrdeli jóndeý jumysy aıaqtalǵan. Endi syrtqy kúrdeli jóndeý jumysyna JSQ daıyndalyp, naqtylaýǵa usynylǵan.
