JAMBYLDA «JASTAR ShAQYRADY» FORÝMY ÓTTI

136

Tamyzdyń 23-25 kúnderi Jambyl oblysy Merki aýdanynyń «Turan» demalys ortalyǵynda «Jastar shaqyrady» atty oblystyq kóshbasshylar forýmy ótti, dep habarlaıdy adyrna.kz ulttyq portaly Jambyl oblysy ákimi apparaty «Qoǵamdyq kelisim» KMM  baspasóz ortalyǵyna silteme jasap.

Jambyl oblysy ákiminiń apparaty «Qoǵamdyq kelisim» kommýnaldyq memlekettik mekemesi men Jambyl oblysy QHA-nyń uıytqy bolýymen ótken is-sharaǵa etnomádenı birlestiginiń jastary qatysty. Naqtyraq aıtsaq, «Jańǵyrý joly» jastar qozǵalysy men «Aq jelken» jastar lıgasynyń músheleri belsendilik tanytyp, óz oılaryn ortaǵa saldy.

Jambyl  oblysy ákimi apparaty «Qoǵamdyq kelisim» KMM basshysy  Rano Ýbaıdýllaevanyń aıtýynsha, jastar elimizdiń bolashaǵy. Sondyqtan da ol aǵa býyn tarapynan jastarǵa zor qoldaý jasalýy kerek ekenin eskertti.

– Bıylǵy jyldy Elbasy Nursultan Nazarbaev jastar jyly dep jarııalaǵany kópshilikke belgili. Osy jastar jyly aıasynda elimizdiń ár aımaǵynda aýqymdy jumystar atqarylyp jatyr. Qaı eldiń bolmasyn áleýmettik-ekonomıkalyq turǵydan turaqty bolýy bilimdi, aqyl-oıy tereń jastardyń qolynda. Sondyqtan jastar qoǵamnyń jetekshi kúshi sanalady. Beıbitshilik pen damýdy kózdep otyrǵan úlken forýmnyń maqsaty – jastardy ulttyq salt-dástúrdi saqtaýǵa, bitimgershilik pen beıbitshilik qundylyqtaryna berik bolýǵa shaqyrady. Sonymen birge, óńirlerdegi daryndy jastardyń shyǵarmashylyǵyn anyqtap, qoldaý kórsetý jáne kótermeleý óte mańyzdy qadam. Jastarǵa ulttyq murany nasıhattap, olardyń mádenı-rýhanı turǵyda tárbıeleý óte mańyzdy. Eń bastysy memlekettik tildi oqytyp, qoǵamdyq kelisimdi qalyptastyrsaq, halyqtyń birligin nyǵaıa túsedi, – deıdi ol.

Eki kún boıy talapty da talantty Jambyl jastary bir-birimen túrli qyzyqty motıvaııalyq tájirıbelerimen bólisti. Biri oıyndar arqyly qyzyqty orta qalyptastyrsa, ekinshisi sport oıyndarymen kópshilikti tánti etti. Sondaı-aq, ónerpaz jastar kórermenderge áserli ánderi men bıleri arqyly jaqsy kóńil-kúı syılap, halyqtyń qoshemetine ıe boldy.

Al, sýda júzý sporttyq oıyny boıynsha - «Lovı volný-2019» jarysy, án aıtý ónerinen – karaoke saıysy, bı saıysynan – dıskobıler uıymdastyryldy. Budan bólek, «Sóıleý sheberligi, sheshendik óner», «Ózińdi-óziń «qamshyla»!» taqyryptarynda semınar-trenıngter jáne «Qazaqtaný» baǵdarlamasy aıasynda ulttyq taǵamdardy daıyndaý boıynsha sheberlik synyptary ótti.

«ADYRNA»

Ulttyq portaly

Pikirler