AES salýdy qoldaý jónindegi Halyqtyq shtab aımaqtarda turǵyndarmen kezdesýler ótkizýdi jalǵastyrýda. Shtab músheleri Ulytaý oblysynyń turǵyndarymen atom elektr stanııasynyń bolashaǵyn talqylady.
Jezqazǵan qalasynda Halyqtyq shtabtyń músheleri óńir turǵyndarymen kezdesý ótkizdi, oǵan 300-ge jýyq adam qatysty. Kezdesýde óńir ekonomıkasynyń damýy jáne atom energetıkasynyń ekologııalyq jaǵdaıdy jaqsartýdaǵy róli sóz boldy. 
Ónerkásibi damyǵan Ulytaý oblysy kóptegen ekologııalyq máselelerge tap bolýda. Shtab músheleriniń aıtýynsha, atom energetıkasyna kóshý aýanyń lastaný problemasyn sheshýdiń tıimdi tásili bola alady, óıtkeni AES – kómir elektr stanııalaryna qaraǵanda áldeqaıda ekologııalyq turǵyda taza. «AMANAT» partııasynyń Atqarýshy hatshysy Dáýlet Káribektiń aıtýynsha, AES – bul energetıkalyq táýelsizdik pen qaýipsizdiktiń kepili.
«Qazirgideı álemde resýrstarǵa, energııaǵa báseke kúsheıgen ýaqytta eldiń energetıkalyq táýelsizdigi, energetıkalyq qaýipsizdigi birinshi orynǵa shyǵyp otyr. Mundaı jaǵdaıda, orynsyz úreı men jónsiz popýlızmniń jetegine erip, AES-ke qarsylyq tanytý el bolashaǵyna jasalǵan qııanat bolar edi.
Sondyqtan, Qazaqstanda AES salý – ómirlik másele ekenin barshamyz uǵynýymyz qajet. Biz osyndaı taǵdyrly máselelerdi keler urpaqtyń moınyna artyp ketpeı, dál búgin batyl, durys sheshim qabyldaýǵa tıispiz. Ulytaý turǵyndaryn birigip, ult bolashaǵy úshin AES qurylysyna qoldaý bildirýge shaqyramyn!», – dedi ol.
