Qazaqstanda alǧaşqy atom elektr stansiiasyn (AES) salu üşın kem degende 14 milliard dollar qajet. Būl turaly atalǧan nysandy saluǧa qatysyp jatqan Reseidıŋ «Rosatom» memlekettık korporasiiasynyŋ bas direktory Aleksei Lihachev mälımdedı, dep habarlaidy “Adyrna”.
Ol būl turaly jurnalist Aqmaral Batalovamen sūhbat barysynda aitty. Lihachevtyŋ aituynşa, būl soma – baǧa men sapa arasyndaǧy eŋ oŋtaily nūsqa.
«Keşe ötken ıs-şarada Qazaqstannyŋ Atom energetikasy agenttıgınıŋ basşysy Almasadam Sätqaliev investisiia kölemın $14-15 mlrd deŋgeiınde atady. Bız būl mälımettı rastaimyz jäne būl baǧa men sapanyŋ eŋ tiımdı üilesımı dep sanaimyz», — dedı «Rosatom» basşysy.
Ol būl soma tek AES-tıŋ qūrylysyn ǧana emes, sonymen qatar onyŋ ūzaqmerzımdı paidalanyluyn josparlauǧa da qajet ekenın atap öttı.
«Bız Qazaqstanǧa AES-tı bırlesıp salumen qatar, törtınşı buyn energetikasyna bırge qadam basudy ūsynamyz», — dedı Aleksei Lihachev.
Eske sala keteiık, Almaty oblysynyŋ Jambyl audanynda AES qūrylysy ekı apta būryn resmi türde bastalǧan bolatyn. Josparǧa säikes, nysan ekı energobloktan tūrady, olardyŋ ärqaisysynda VVER-1200 reaktory ornatylady. Däl osyndai reaktorlar Türkiiadaǧy «Akkuiu» AES-ınde de paidalanylyp jatyr.
