Türkıstan erekşe märtebege ie bolady. Parlament mäjılısınde "Türkıstan qalasynyŋ erekşe märtebesı turaly" zaŋ jobasy ūsynyldy. Būl turaly Ūlttyq ekonomika ministrlıgı mälımdedı, dep habarlaidy “Adyrna” ūlttyq portaly.
"Zaŋ jobasyn äzırleuge Türkıstan qalasyn Türkı memleketterı ūiymymen türkı älemınıŋ ruhani astanasy retınde tanuy, qalanyŋ tarihi kelbetı men tarihi-mädeni mūra obektılerın saqtau qajettılıgı negız boldy", - dep jazylǧan habarlamada.
Zaŋ jobasynyŋ negızgı novellalary:
Türkıstan qalasynyŋ arheologiia eskertkışterınıŋ rezervatyn qūru,
Qoja Ahmet Iаsaui kesenesınıŋ ainalasyndaǧy qūrylysty şekteu,
käsıpkerler men qolönerşılerdı qoldau syndy özge de şaralar.
"Qalaǧa erekşe märtebe beru Türkıstannyŋ türkı älemınıŋ ruhani astanasy, turister men qajylardy tartu ortalyǧy retındegı äleuetın jan-jaqty aşuǧa mümkındık beredı, nätijesınde bükıl öŋırdıŋ äleumettık-ekonomikalyq damuyna ärı halyqtyŋ ömır süru deŋgeiın sapaly jaqsartuǧa multiplikativtık äser etedı", - dep atap öttı ūlttyq ekonomika vise-ministrı Bauyrjan Omarbekov.
Türkıstan qalasynyŋ mäslihaty qala qūrylysy reglamentın, qalanyŋ dizain-kodyn, säulet kelbetın qalyptastyru jäne qala qūrylysyn josparlau qaǧidalaryn, Türkıstan aumaǧynda rämızderdı qoldanu tärtıbın jäne t.b. bekıtedı.
Qala äkımdıgıne 3 baǧyt boiynşa 27 qūzyret berıledı. Alǧaşqysy qalanyŋ mädeni igılıgı men ruhani damuyn saqtau mäselelerın retteuge, tarihi-mädeni mūra obektılerınıŋ saqtaluyn qamtamasyz etuge baǧyttalǧan.
Ekınşı baǧyt – kesenenıŋ ainalasyndaǧy qūrylys standarttaryn jäne qala aumaǧynda bıryŋǧai qūrylys stilın qoldanu.
Üşınşı baǧyt – turistık qyzmetke järdemdesu mäselelerın retteuge jäne ony damytu üşın qolaily jaǧdailar jasauǧa, turistık tartymdylyq oryndarynyŋ qoljetımdılıgın qamtamasyz etu üşın kölık jäne injenerlık infraqūrylymdy beiımdeuge baǧyttalǧan.
Būdan bölek, ılespe zaŋ jobasy äzırlendı, onyŋ şeŋberınde Jer kodeksıne, "QR säulet, qala qūrylysy jäne qūrylys qyzmetı turaly", "Tarihi-mädeni mūra obektılerın qorǧau jäne paidalanu turaly", "QR turistık qyzmet turaly" zaŋdarǧa özgertuler men tolyqtyrular engızu közdelgen.
