Zańger: Raqymshylyq - memlekettiń azamattarǵa janashyrlyǵynyń kórinisi

2381
Adyrna.kz Telegram

Mundaı pikirdi Zańnama jáne quqyqtyq aqparat ınstıtýtynyń bas ǵylymı keńesshisi, L.N.Gýmılev atyndaǵy EUÝ professory Ermek Ábdirasulov aıtty, dep habarlaıdy "Adyrna" ulttyq portaly. 

- Bul sheshimdi durys dep esepteımin. Mundaı sharanyń kerek ekenin Prezıdent Qasym-Jomart Toqaev sońǵy Joldaýynda aıtqan edi. Sonyń nátıjesinde búgingi tańda Parlament qajetti zań jobasyn qabyldady. Raqymshylyq týraly zań jobasyn ázirleýge belgili zańgerler men sarapshylar atsalysty. Eń aldymen muny gýmanızm aktisi desek bolady. Kóptegen memlekette osyndaı raqymshylyq jasaý zań aıasynda jıi qoldanylady, - dedi Ermek Ábdirasulov.

Sonymen qatar, sarapshy zańnyń naqty kimderge qoldanylatynyn túsindirdi.

- Qańtar oqıǵasy kezinde, naqtyraq aıtsaq, 4-7 qańtar aralyǵynda qylmystyq teris qylyqtar jasaǵan azamattar, sonymen birge aýyrlyǵy az jáne ortasha qylmystar zańdy sottylyqtan alyp tastaı otyryp, jazadan tolyq bosatýdy kózdeıdi. Raqymshylyq bılikti asyra paıdalanǵan, oqıǵany uıymdastyrǵan, terrorısterge jáne ekstermısterge, adamdy azaptaǵandarǵa jasalmaıdy, - dedi professor Ábdirasulov.

Sarapshynyń aıtýynsha, bul iske qatysy bar 1600 jýyq adam anyqtalǵan, qazirgi tańda 1500 azamat raqymshylyqqa ilingen.

- Raqymshylyq ınstıtýty degenimiz – quqyqtyq memlekette gýmanızm prınıpin júzege asyratyn uıym. Bul ınstıtýt memlekettiń azamattarymyzǵa janarshyrlyǵynyń kórinisi dep sanaımyn. Bul Ádiletti Qazaqstandy qurý jolynda ózekti sharalardyń biri dep sanaımyn, - dedi zańger.

Eske sala keteıik, Parlament qańtar oqıǵasyna qatysýshylarǵa raqymshylyq jasaý týraly zańdy qabyldaǵan edi.

Senattyń jaýapty komıtetiniń qorytyndysynda kórsetilgendeı, Zań jobasyna depýtattar bastamashylyq jasady jáne ol Memleket basshysynyń 2022 jylǵy 1 qyrkúıektegi Qazaqstan halqyna joldaýy sheńberindegi tapsyrmalardy oryndaý úshin ázirlendi.

"Adyrna" ulttyq portaly

Pikirler