Aqmola oblysynyń ortalyǵy Kókshetaý qalasynyń ishki saıasat bólimi 2 mln 520 myń teńgege gúl satyp alýǵa tender jarııalady, dep habarlaıdy "Adyrna" ulttyq portaly satypalu.gov.kz saıtyna silteme jasap.
Kókshetaý qalasynyń ishki saıasat bólimi 13 qyrkúıek kúni "Tiri raýshan gúlder" degen taqyryppen tender jarııalaǵan. Memlekettik satyp alýdyń jeńimpazy 20 qyrkúıek kúni anyqtalady. Tehnıkalyq sıpattamada satylyp alynatyn gúlderdiń golland raýshany bolýy, uzyndyǵy 1 metrden, qaýyzynyń dıametri 12 sm-den kem bolmaýy kerektigi kórsetilgen. Sondaı-aq gúlderdiń tústeri tapsyrys berýshiniń ótinishi boıynsha ákelinetini, gúl búrshikteriniń syrtqy zaqymdalýyna jol berilmeıtini, aldyn ala ótinim negizinde ónim berýshi gúldi ýaqytynda jetkizýge tıis ekeni jazylǵan. Biraq, tehnıkalyq sıpattamada mundaı kóp kólemdi gúldiń qalalyq ishki saıasat bólimine nege qajet bolyp otyrǵany aıtylmaǵan.
Kókshetaý qalasynyń ishki saıasat bólimi 2 mln 520 myń teńgege 1800 dana (ár danasy 1400 teńge) gúldi ne istemek? Memleket satyp alý qujattarynda jumys merzimi qyrkúıek-jeltoqsan aılarynyń arasy dep kórsetilgen. Bizdiń bilýimizshe, alda gúl syılaýǵa bolatyn eki-aq memlekettik mereke bar. Olar: 25 qazan - Respýblıka kúni, 16 jeltoqsan - Táýelsizdik kúni. Sol eki merekede qalanyń ishki saıasat bólimi 1800 adamǵa gúl taratýy múmkin be?
Bul suraqtardy tıisti mekemege joldadyq. Olardan jetken jaýapty aldaǵy ýaqytta jarııalaıtyn bolamyz.
Abaı Asyl
“Adyrna” ulttyq portaly
