Almaty oblysy, Raiymbek audanyna qarasty Qyzylşekara auylynyŋ tūrǧyndary auyldaǧy jalǧyz bılım oşaǧynyŋ jaǧdaiyna alaŋdap otyr. «Adyrna» ūlttyq portalyna habarlasqan tūrǧyndardyŋ aituynşa, Ködek Baişyǧanūly atyndaǧy mektep 1979 jyly salynǧannan berı tolyq jöndeuden ötpegen jäne qazırgı taŋda ǧimarattyŋ jaǧdaiy apatty deŋgeige jetken.
Auyl tūrǧyndary mekteptıŋ qabyrǧalary ajyrap, edenderı şırıp, keibır synyp bölmelerınde ortasy opyrylyp tüskenın aitady. Sonymen qatar, sport zaldyŋ edenınde saŋyrauqūlaq paida bolyp, būl balalardyŋ densaulyǧyna tıkelei qauıp töndırıp otyr degen uaiymdaryn jetkızdı.
Qazırgı taŋda būl mektepte şamamen 250 bala bılım alady. Ata-analar äsırese bırınşı synypqa baratyn balalardyŋ qauıpsızdıgıne qatty alaŋdauly. Olar bırneşe ret audandyq bılım bölımıne jäne tiıstı organdarǧa jügıngenımen, mäsele älı naqty şeşımın tappaǧanyn aitady.
Tūrǧyndardyŋ sözınşe, jergılıktı bilık ökılderı mekteptıŋ kelesı jyldary kürdelı jöndeuge engızıletının aitqan. Alaida uaqyt ötken saiyn ǧimarattyŋ jaǧdaiy jaqsarudyŋ ornyna naşarlap bara jatqan körınedı. Qauymdastyq ökılderı öz küşımen jürgızılıp jatqan aǧymdaǧy äkteu men syrlau jūmystary mäselenı tübegeilı şeşe almaitynyn alǧa tartady.
Ata-analardyŋ alaŋdauşylyǧyn küşeitıp otyrǧan taǧy bır jait – öŋırdegı infraqūrylymdyq basymdyqtar. Tūrǧyndar audannyŋ 90 jyldyq mereitoiyna arnalǧan ıs-şaralarǧa qomaqty qarajat bölınıp jatqanyn, al balalar oqityn qauıpsız mektep mäselesıne qarjy tabylmai otyrǧanyna narazy.
«Eger jer sılkınısı nemese tabiǧi apat bolsa, 250 balanyŋ qauıpsızdıgıne kım jauap beredı? Toiǧa aqşa tabylady, mekteptı jöndeuge joq?» - deidı auyl tūrǧyndary.
Qyzylşekara halqy bilıkten mektep ǧimaratyn şūǧyl tekserıp, ony tolyq qaita jaŋǧyrtu nemese jaŋa bılım ordasyn salu mäselesın tez arada şeşudı talap etıp otyr. Olardyŋ aituynşa, balalardyŋ qauıpsızdıgı kez kelgen merekelık ıs-şaradan da joǧary tūruy tiıs.
Tūrǧyndardyŋ şaǧymyna audan äkımdıgı jelıde resmi jauap berdı. Degenmen, olardyŋ aituynşa, jauapkerşılık özderınde emes.
«2026 jyly mekteptıŋ kürdelı jöndeu jūmystaryn jürgızu üşın oblystyq qūrylys basqarmasynyŋ teŋgerımıne ötkızılıp berıldı. Kürdelı jöndeu jūmystaryn jürgızu oblystyq qūrylys basqarmasynyŋ qūzyrynda ekenın habarlaimyz», dep habarlaǧan äkımdık.
