Air Astana áýe kompanııasynan halyq ártisi Bıbigúl Tólegenovaǵa dórekilik tanytqany úshin keshirim suraý talap etilýde, dep habarlaıdy "Adyrna" ulttyq portaly.
"2024 jyldyń 3 qyrkúıeginde saǵat 10:30-da Astanadan Almatyǵa ushatyn Eır Astana 852 reısinde qoǵamnyń qaıda bara jatqanyn oılandyratyn bir jaǵdaı boldy. KSRO halyq ártisi jáne Qazaqstannyń halyq ártisi, ańyzǵa aınalǵan ánshi Bıbigúl Tólegenova Air Astana áýe kompanııasynyń qyzmetkeri tarapynan dórekilik pen qurmetsizdikke tap boldy. Bıbigúl Ahmetqyzyn múgedekter arbasynda ushaq bortyna ótkizbek bolǵanda áýe kemesine ótýdi baqylaıtyn qyzmetker toqtatyp, arbadaǵy jolaýshylardyń birinshi bolyp nemese eń sońǵy jolaýshy ótkennen keıin ǵana ótýi kerektigin dóreki túrde eskertken», - dep jazdy Leka Saveleva Facebook paraqshasynda.
Áýe kompanııasynyń qyzmetkerlerine Bıbigúl Ahmetqyzynyń omyrtqasynda aýyr aqaý bar ekeni habarlandy. Arbaǵa tańylǵan aktrısany qyzy ertip kele jatqanda, olardy kenetten Air Astana qyzmetkeri toqtatyp, arbadaǵy jolaýshylar birinshi bolyp otyryp úlgerýi kerek nemese sońǵy jolaýshy ótkenshe kútý kerek dep qatty eskertken.
Osydan keıin Bıbigúl Ahmetqyzy qyzmetkerge óziniń Astana qalasynyń Qurmetti azamaty ekenin jáne oǵan qansha qatal ereje bolsa da, erekshe jaǵdaı jasaýǵa laıyq ekenin aıtty. Kompanııa qyzmetkeri bunyń bárinen habardar ekenin, biraq ereje adamdardyń mártebesine, jasyna nemese jaǵdaıyna qaramastan, bárine birdeı qoldanylatynyn aıtty.
"Kompanııanyń qarttardy, ásirese elimizdi halyqaralyq arenada tanytqan tulǵalardy qurmetteýdi qyzmetkerlerge nege úıretpegenin bilgimiz keledi? Negizgi qurmet-ádep erejesi qaıda? Nelikten osyndaı adamdarǵa klıenttermen jumys isteýge ruqsat etiledi? Ulttyq tasymaldaýshy kompanııa qyzmetkerleriniń mundaı minez-qulqy masqara jaǵdaı ekeni anyq. Air Astana, barshamyzdyń súıikti tulǵamyz Bıbigúl Ahmetqyzy Tólegenovaǵa qatysty sizderdiń túsiniktemelerińiz ben keshirimderińizdi kútemiz!», - dep úndeý jasady Leka Savaleva.
Al áýe kompanııasy bul jaǵdaıdy qaýipsizdik úshin bolǵanyn aıtady.
«Bıbigúl Ahmetqyzy Tólegenovaǵa degen qurmetimiz erekshe! Air Astana áýe kompanııasy úshin qaýipsizdik basty orynda. Áýe qaýipsizdiginiń halyqaralyq erejelerine saı, arbada otyrǵan jolaýshylar ushaqqa eń birinshi bolyp nemese eń sońynda minedi. Iaǵnı, osy ereje jolaýshylardyń bári úshin yńǵaıly, sondaı-aq, termınaldan evakýaııalaý erejelerine saı. Bizdiń qolymyzdaǵy aqparatqa súıensek, Qazaqstannyń halyq ártisi Bıbigúl Tólegenova men onyń qyzy jolaýshylar ushaqqa mine bastaǵanda kelgnen. Sondyqtan, áýe kompanııasynyń agenti jolaýshylar minip alǵansha kúte turyńyzdar degen. Áýe kompanııasy osy oqıǵanyń oryn alǵanyna qatty ókinedi jáne qyzmet sapasyn jaqsartý úshin qosymsha tekseris júrgizedi», - dep jazǵan kompanııa.
