QR Májilisiniń eks-depýtaty Omarhan Óksikbaev "Eır Astana" áýe kompanııasyn qatań synǵa aldy.Bul týraly ol Facebook jelisindegi paraqshasynda jazdy, dep habarlaıdy “Adyrna” ulttyq portaly.
Aıtýynsha, “Eır Astanaǵa” eshkimniń azýy batyp, baqylaı almaı otyr.
"Ádil Qazaqstan demekshi, biz ár iste ádildik jeńgenin qalaımyz. Alaıda sol ádildiktiń aýly tolyq kórinbeı tur. Búgin aıtpaqshym bizdi ońdy soldy aldap-arbap, ókiletti organdarymyzdyń shalalyǵyn paıdalanyp, kenedeı halqymyzdyń qaltasyn qaǵyp jatqan alpaýyt kompanııalar týraly. Sonyń biri - Eır Astana kompanııasy. Bıletteriniń qymbattyǵyn aıtyp aýzymyz taldy, tańdaıymyz kepti. 2006 jyly men Esep komıtetin basqaryp otyrǵanda osy kompanııany tekserip kóptegen bylyqtardyń betin ashyp edik, tek bizdiń usynystan keıin kompanııa birinshi samoletterin alýdy bastap edi. Sodan keıin bul alpaýytqa eshkimniń azýy batyp baqylaý jasaǵan emes.
Bárimizge belgili monopolııaǵa qarsy kúres agenttigin tekserýge kirgizbeı mazaq jasaǵany. Mine osyndaı bizdiń atqarýshy bıliktiń álsizdigin paıdalanyp atalmysh kompanııa endi halqymyzdan kórsetpegen qyzmeti úshinde aqy alýdy mine bes jylǵa jýyq ýaqyt jalǵastyryp keledi. Sóıtip mıllıardtaǵan zańsyz tabys tabýda”,- dedi depýtat.
Sondaı-aq, ol bılet qunynyń sharyqtaýy týraly da sóz qozǵaı ótti.
“Meniń aıtyp otyrǵanym kompanııanyń samolettiń ekonom klastaǵy aldyńǵy úsh qatar oryndy qosymsha aqy úshin satýy. Ár osy oryndar úshin olar 6000-nan 15000 teńgege deıin bılettiń qunynan tysqary aqy alyp otyr. Meıli, alsyn delik, biraq sol qarjyǵa kórsetetin qyzmeti bolýy kerek qoı! Al ol joq, sol orynda otyrǵandarǵa basqa ekonomklasta otyrǵandarmen teń qyzmet kórsetiledi. Qosymsha qyzmet bolmasa qosymsha aqy alý zańsyz dep bilemin! Tıisti quzyrly organdar osy máseleni tekserip, halyqty qanaýdy toqtatýy kerek. Bilemin keıbir qorǵashtar shyǵady: “naryq zańy boıynsha suranys bolǵan soń solaı istep otyr” dep. Ókiletti organ bul kompanııanyń monopoldy ekenin umytpaǵany durys!", - dedi májilis depýtaty.
