Oral qalasyndaǵy oblystyq perınataldyq ortalyqta erekshe jaǵdaı boldy. Anatomııalyq ereksheligi - eki jatyry bar áıel aldymen bir balany, al eki aıdan keıin ekinshisin dúnıege ákeldi, dep habarlaıdy uralskweek.kz óńirlik saıty.

Lılııa Konovalova birinshi balany mamyr aıynda týdy. Shala týǵan qyzdyń salmaǵy 850 gramm bolǵan. Ony birden jansaqtaý bólimine jatqyzdy. Dárigerler sábıdiń densaýlyǵyn únemi baqylap otyrdy. Arnaıy ońaltý sharalary uıymdastyrylǵan.

"Al 9 tamyzda kesar tiligin jasaý arqyly qyzdyń inisi dúnıege keldi. Onyń salmaǵy – 2 900 gramm. Qazirgi kezde anasy eki balasymen perzenthanadan shyǵýǵa daıyndalyp jatyr", - deıdi bas neonatolog Nurgúl Júnisova.

Egizderdiń anasy sharshańqy kórinse de, baqytty ekenin jasyrmady. Onyń aıtýynsha, endi úıdegi úlken qyzdyń eki baýyry bolady.

"Meniń taǵy bir 7 jasar qyzym bar. Ekinshi qyzdyń atyn Leıa dep qoıamyz. Al ulymyz – Maksım. Men anatomııalyq ereksheligim týraly bilgenmin, biraq oǵan eshqashan mán bermeppin", - dedi Lılııa Konovalova jýrnalısterge bergen suhbatynda.

Basylymnyń habarlaýynsha, sońǵy 60 jyldyń ishinde álem boıynsha mundaı jaǵdaılardyń sany 70-ten asty, al Qazaqstanda alǵash ret bolyp otyr.

Perzenthana dárigerleri kelinshektin anatomııalyq ereksheligi - eki jatyry baryn bilgenin aıtady. Sondyqtan ekinshi balaǵa tolǵaqtyń qashan keletinin kútti.

"Biz kelinshektiń anatomııalyq ereksheligi týraly birden bildik. Sol sebepti ekinshi balany da osy jerde bosandyryp alýǵa sheshim qabyldaǵan bolatynbyz. Bilýimshe, bul - alǵashqy oqıǵa. Men Almatydaǵy áriptesterimnen keńes aldym, bul elimizde tirkelgen alǵashqy jaǵdaı sııaqty", - dedi perzenthana dırektorynyń orynbasary Eset Eralın.