Qazaqstan bilıgı naqty josparsyz Nazarbaev Ziiatkerlık mektepterıne (NZM) bes jyl ışınde 250 milliard teŋge bölgen. Būl turaly joǧary auditorlyq palata mälımdedı, dep habarlaidy “Adyrna” ūlttyq portaly QazTAG-qa sıltep.
«Jalpy eseptı kezeŋde (2019-2023 j.) NZM jūmys ısteuıne biudjetten 250 mlrd teŋge, onyŋ ışınde täjıribenı audaruǧa 22 mlrd teŋgeden astam qarajat bölındı. Sonymen qatar, bügınde memlekettık josparlau jüiesındegı NZM rölınıŋ naqty anyqtamasy joq», - dep habarlady joǧary auditorlyq palata.
Aqparatqa säikes, bılım beru üderısı üşın beiındı ministrlık maqūldaǧan 3 myŋnan astam oqulyqtyŋ NZM ülesıne nebärı 67 nemese 2% - y tiesılı, iaǧni ūiymnyŋ orta bılım beru jüiesın damytu jönındegı qolda bar äleuetı tolyq kölemde paidalanylmaidy. Qol jetkızılgen nätijeler bölınetın qarjylandyru kölemıne säikes kelmeidı. Mysaly, Ūlytau oblysynyŋ barlyq biudjetı bes jyldan az uaqyt ışınde NZM-ge bölındı. Onyŋ ışınde, täjıribenı taratuǧa T22 mlrd astam.
NZM qarjylandyru mehanizmı qarajattyŋ aşyqtyǧyn, eseptılıgın jäne maqsatty paidalanyluyn qamtamasyz etpeidı. NZM jüzege asyrylmaǧan şaralardy josparlaǧany anyqtaldy. Auditorlardyŋ qorytyndysy boiynşa 2019-2023 jyldarǧa oryndalmaǧan şaralardyŋ kölemı şamamen 8 mlrd teŋgenı qūrady.
Sondai-aq, üş jyl ışınde NZM 16,4 mlrd teŋgenı igermegen, al bank şottarynda jyl saiyn 27 mlrd teŋgeden 55 mlrd teŋgege deiın qarajat jinaqtalǧan.
Jalpy memlekettık audit anyqtaǧandai: 274,4 mln teŋgege qarjylyq būzuşylyqtar, tiımsız josparlau – 8,3 mlrd teŋge, tiımsız paidalanu – 6 mlrd teŋgege juyq, 134 räsımdık jäne 30 jüielık kemşılıkter.
Tekserulerdıŋ qorytyndysy boiynşa bır material qūqyq qorǧau organdaryna joldansa, taǧy 10 material äkımşılık ıs qozǧauǧa joldandy.
