Reseı men Qazaqstannyń quqyq qorǵaý organdary eki eldiń azamattarynan turatyn 15 adamnan quralǵan qylmystyq topty ustady. Top eki adamdy urlap, olardy garajda ustaǵan. Bul týraly BaıkonýrInfo jarııalady, dep habarlaıdy “Adyrna” ulttyq arnasy.
Aqparatqa sáıkes, qylmystyq toptyń jetekshisi — 38 jastaǵy Reseı azamaty, buǵan deıin sottalǵan. Ol tanysynyń kóligin urlady dep kúdiktenip eki adamdy urlaýdy josparlaǵan.
«Olar zardap shekkenderdi garajda ustap, uryp-soqqan. Birine aýyr dene jaraqaty salyp, ómirine qaýip tóngen», — dep málimdedi Baıqońyrdaǵy tergeý bóliminiń aǵa tergeýshisi Oleg Hanjın.
Sot qylmystyq top jetekshisin kináli dep tanyp, oǵan qatań rejımdegi kolonııada 10 jyl bas bostandyǵynan aıyrý jazasyn taǵaıyndady. Al 14 Qazaqstan azamatyna qatysty úkimdi Qyzylorda oblysyndaǵy Qazaly aýdandyq soty shyǵardy.
Sottyń baspasóz qyzmetiniń málimeti boıynsha, 13 aıyptalýshy QR Qylmystyq kodeksiniń 125-baby 2-bóligi («Adam urlaý») jáne 126-baby 3-bóligi («Zańsyz bas bostandyǵynan aıyrý») boıynsha kináli dep tanylyp, olarǵa 7 jyldan 8,5 jylǵa deıin bas bostandyǵynan aıyrý jazasy belgilendi. Bir aıyptalýshy qylmysty jasyrǵany úshin 8 aıǵa túrmege qamaldy.
Qazaqstannyń Qyzylorda oblystyq soty aıyptalýshylardyń jazalaryn jeńildetti.
