Alakól kólinde deltaplannan qulap, zardap shekken áıel men er adamnyń qazirgi jaǵdaıy belgili boldy. Bul týraly Jetisý oblystyq densaýlyq saqtaý basqarmasy málimdedi, dep habarlaıdy “Adyrna” ulttyq portaly.
Málimetke sáıkes, olar jedel járdem kóligimen Alakól aýdanynyń ortalyq aýdandyq aýrýhanasyna jetkizilgen.
"Jábirlenýshilerdiń jaǵdaıy aýyr boldy, olar anestezıologııa, reanımaııa jáne qarqyndy terapııa bólimine jatqyzyldy", - delingen habarlamada.
Olar qazir shokqa qarsy terapııadan, sonymen qatar tolyq klınıkalyq-dıagnostıkalyq tekserýlerden ótip jatyr. Taldyqorǵannan emdeý mekemesine eki maman – neırohırýrg pen travmatolog jiberildi.
"Aýrýhanada naýqastardy emdeýge qajetti barlyq dári bar. Jaǵdaı baqylaýda", - dep habarlady basqarma.
Aıta keteıik, 25 shildede Alakól kólinde deltaplan qulaǵanyn habarladyq. Vedomstvo ókilderi deltaplannan sýǵa qulaǵan eki adamdy aman alyp qaldy. Keıin Azamattyq avıaııa komıteti oqıǵanyń egjeı-tegjeıin aıtty.
