3-tamyz kúni Almaty qalasyndaǵy Ulttyq kitaphanada "Adyrna" ulttyq-etnografııalyq birlestiginiń uıymdastyrýymen belgili mádenıettanýshy Berdaly Ospannyń "Salttar álemine saıahat" atty kitabynyń tusaýkeseri ótti. Ataýly kitap "Azamattyq bastamalardy qoldaý ortalyǵy" KEAQ-nyń memlekettik granty aıasynda QR Aqparat jáne qoǵamdyq damý mınıstrliginiń qoldaýymen júzege asyrylyp jatqan "Dástúrli rýxanı qundylyqtardy qoldaý jónindegi jumystardy uıymdastyrý" jobasy aıasynda shyǵyp otyr. Kitap tusaýkeserine "Aqıqat" jýrnalynyń bas redaktory Amanhan Álim, Eýrazııa ınnovaııalyq ýnıversıtetiniń professory, kitaptyń alǵy sózin jazǵan Táýke Altynbekov, "Mámile" klýbynyń jetekshisi Qanat Tasıbekov, professor, kompozıtor Bahtııar Amanjol, fılolog Qanat Jańabaev, aýdarmashy Marat Jumaǵazıev syndy tulǵalar qatysty. Akademık Hangeldi Ábjanov tizgindi qolǵa alyp, bastan-aıaq júrgizip shyqty. Qyzyqty tarıhı derekter arqyly qazaqy bolmysty ashyp kórsetken rýhanı kitapqa pikir bildirýshiler de kóp boldy.
Belgili aqyn Amanhan Álim kitaptyń paıdasy mol, eger oqýlyqqa engizer bolsa, oqyrman úshin qabyldaýǵa jeńil bolatyndyǵyn aıtyp, bul qundy dúnıeniń dástúrimizdi nasıhattaýda úlken septigi tıetinin jetkizdi. Kitap alǵy sózin jazǵan Táýke Altynbekov: "Qazaq salty - ádemi, úılesimdi ári mazmuny óte tereń rýhanı qubylys. Osy oraıda Berdaly Ospannyń kitaby salt-dástúrler arqyly ultymyzdyń kodyn tanýǵa jaqyndatýymen baǵaly",- degen pikir bildirdi. Jıyn sońynda "Salttar álemine saıahat" kitabyn birneshe tilde, ásirese orys, aǵylshyn tilderine aýdarý qajettigin, onyń ulttyq bolmysymyzdy ózge elge tanytýda paıdasy mol ekeni aıtylyp, usynys tastaldy. Sonymen qatar, álipbı boıynsha qurylǵan kitap mazmunyn taqyryp maǵynasyna qaraı júıeleý mańyzdy ekendigi de saralandy. Kitap avtory Berdaly Ospan áli talaı izdenisti qajet etetin dúnıelerdiń kóptigin aıtyp, bolashaqta olardyń da jaryqqa shyǵatyndyǵynan habardar etti. Sonymen qatar avtor jıynǵa qatysqan adamdardyń barlyǵyna sheksiz alǵysyn bildirdi.
Jansaıa SMAN
"Adyrna" ulttyq portaly
