Qaraǵandydaǵy ferroqorytpa zaýytynda bolǵan apattan zardap shekken taǵy eki adam kóz jumdy. Tórt naýqastyń jaǵdaıy áli de aýyr. Bul týraly 25 shildede Qaraǵandy oblystyq Densaýlyq saqtaý basqarmasy aıtty, dep habarlaıdy «Adyrna» tilshisi.
«1981 jáne 1987 jyly týylǵan naýqastar esin jımastan qaıtys boldy. Dárigerler olardyń ómirin saqtap qalý úshin bar kúsh-jigerip salyp, kúresken bolatyn. Qaza tapqandardyń jaqyn týystaryna shyn júrekten kóńil aıtamyz», - delingen habarlamada.
Baqılyq bolǵan Adamchýk Dmıtro balqytý ehynyń mehanıgi, al Tólegen Jetpisbaev bas mehanık qyzmetiniń sheberi bolyp jumys istegen.
Eske salaıyq, 20 shildede Qaraǵandy ferroqorytpa zaýytynda peshten órt shyǵyp, 8 adam jaraqat aldy. Buǵan deıin 2 jumysshy qaıtys bolǵanyn jazǵan edik.
