Qazaqstandyq mánerlep syrǵanaýshy Denıs Tendi óltirgender jazasyn barynsha qatań qaýipsizdik rejımindegi kolonııada ótep jatqan edi. Alaıda sportshynyń qazasyna alty jyl ótkennen keıin sot olardyń jazasyn jeńildetken, dep habarlaıdy “Adyrna” ulttyq portaly Tengrinews.kz saıtyna silteme jasap.
Aıta keteıik, Denıs Tenniń ólimine kináliler – Nuraly Qııasov pen Arman Qudaıbergenovtiń jazasy jeńildetilgeni belgili boldy. Olar barynsha qatań qaýipsizdik rejımindegi kolonııada otyrǵan bolatyn. Byltyr olardy ortasha qaýipsizdik mekemesine aýystyrǵany anyqtaldy.
Aqparatqa sáıkes, 2023 jyldyń 19 qazanynda Qonaev qalasynyń soty Nuraly Qııasovtyń jazasyn jeńildetýdi qarastyrǵany belgili boldy. Bul usynysty Almaty oblysyndaǵy №12 mekeme basshysy jasaǵan.
Bul 2023 jyldyń naýryzynda qabyldanǵan zańdaǵy ózgeristermen túsindirildi: buryn bas bostandyǵynan aıyrylmaǵan, 2 jyldan astam merzimge sottalǵandar jazasyn qylmystyq-atqarý júıesiniń ortasha qaýipsizdik mekemelerinde óteı alady.
Sonymen qatar, QAJD Qııasovtyń tergeý ızolıatorynda ótkizgen 8 aıǵa jýyq ýaqytyn oǵan berilgen merzimge esepteýdi usynǵan.
Sot ony qanaǵattandyryp, Qııasovty ortasha qaýipsizdik rejımindegi kolonııaǵa aýystyrdy. Arman Qudaıbergenovke qatysty da osyndaı sheshim shyǵarylǵan.
QAJK jýrnalısterge qazirgi ýaqytta Qudaıbergenov pen Qııasov Jambyl jáne Shyǵys Qazaqstan oblystaryndaǵy ortasha qaýipsizdik mekemelerinde jazalaryn ótep jatqanyn habarlady.
Olar jumys istemeıdi. Alaıda QAJK buny jumys oryndarynyń jetispeýshiligimen túsindiredi. Olar qarapaıym jaǵdaılarynda ustalady. Medıınalyq kómekke júginbegen.
Sonymen qatar, iske taǵy bir kúdikti - Janar Tólebaeva boldy. Ony qylmys týraly habarlamaǵany úshin tórt jyl bas bostandyǵynan aıyrýǵa úkim etken bolatyn.
Alaıda bir jyldan keıin ony densaýlyq jaǵdaıyna baılanysty jáne bosanýyna baılanysty bosatty. Degenmen, ol óz merzimin keıinirek ótep shyǵyp, 2021 jyly bosatylǵan.
Búgin, 19 shildede Almaty ortalyǵynda qazaqstandyq mánerlep syrǵanaýshy Denıs Tenniń óltirilgenine alty jyl toldy. Ol kezde ol kóliginiń aınalaryn urlamaq bolǵan urylarmen qaqtyǵysqa túsken bolatyn.
