Memlekettik rámizderge qatysty estafeta men vıktorına joǵarǵy deńgeıde ótti

170

«Memlekettik rámizder – bul bizdiń memleketimizdiń, bizdiń egemendigimizdiń berik negiziniń biri. Olar Táýelsizdiktiń qasıetti biriktirýshi obrazyn bildiredi» dep Tuńǵysh Prezıdent Nursultan Nazarbaev aıtqandaı rámizderdiń adam ómirinde alatyn orny zor.


Soǵan oraı shilde aıynda Memlekettik rámizderdi qurmetteý maqsatynda «Adyrna» ulttyq-etnografııalyq birlestiginiń uıytqy bolýymen «Memlekettik rámizderdiń birimen túsken fotosýretter» estafetasy respýblıkalyq deńgeıde ótti. Estafetaǵa kári-jas demeı, búkil qazaq eliniń ultjandy azamattary men azamatshalary belsene qatysty. Estafeta shilde aıynyń 2-juldyzynan bastap, 21-ne deıin jalǵasty. Estafeta «Vkontakte», «Feısbýk», «Instagram» áleýmettik jelilerinde, «Whatsapp» messendjerinde júzege asty. Atalǵan áleýmettik jelilerde qatysýshylar memlekettik rámizdermen túsken fotosýretterin jarııalap, astyna qundy jazbalaryn jazdy.


Al Memlekettik rámizder týraly qanshalyqty bilemiz? Onyń ústine ol týraly bilimimiz sapaly ma? Mysaly sizdiń oıyńyzsha eltańbadaǵy shuǵylaly kúndegi ýyqtardyń sany qansha? Al týdyń eni men uzyndyǵynyń araqatynasy qandaı bolý kerek? «Meniń Qazaqstanym» áni jaryqqa shyqqannan keıin, neshe jyldan soń memlekettik gımnge aınaldy? Bilmeseńiz, biz osy suraqtardy áleýmettik jelide uıymdastyrylǵan vıktorınalyq suraqtardyń qataryna engizdik. Estafetanyń artyn sýytpaı, memlekettik rámizderge qatysty 12 vıktorınalyq suraqtar legi qoıyldy. Feısbýk, Instagramm, Vkontakte áleýmettik jelilerinde, Vatsap messendjerinde qoıylǵan suraqtarǵa qatysýshylar belsendilikpen jaýap berdi.

 

Aqgúl AIDARBEKOVA

"Adyrna" ulttyq portaly

Pikirler