Aqtóbe qalasynyń memlekettik satyp alýlar bólimi jaıaý júrginshiler ótkelin jaryqtandyrý jumysyna 17 mln 244 myń 591 teńge qarjy bóldi, dep habarlaıdy Adyrna ulttyq portaly goszakup.gov.kz saıtyna silteme jasap. Qaladaǵy jaıaý júrginshiler ótkelin jasaýǵa tapsyrysty Aqtóbe qalasynyń turǵyn-úı kommýnaldyq sharýashylyǵy, jolaýshylar kóligi jáne avtomobıl joldary" bólimi bergen.
Tenderdiń ótetini týraly habarlama 27 qazan kúni jarııalandy. Jeńimpaz 3 qarashada anyqtalady. Tenderdi utyp alǵan kompanııa 17 mln 244 myń 591 teńgege bar bolǵany 11 jaıaý júrginshiler ótkeline jaryqtandyrý jumystaryn júrgizedi.
Tehnıkalyq sıpattamada kerekti qural-jabdyq satyp alý týraly eshteńe kórsetilmegen. Sondaı-aq, tehnıkalyq sıpattamadaǵy "Qurylysqa baılanysty emes, satyp alynatyn jumystardyń tehnıkalyq ereksheligi" degen sóılemnen jeńimpaz kompanııa satyp alynyp qoıǵan daıyn materıaldardy ornatyp shyǵý jumysyna ǵana mindettelip otyrǵanyn baıqaýǵa bolady. Iaǵnı, 17 mln 244 myń 591 teńgege bar bolǵany 11 jaıaý júrginshiler ótkeline elektr baǵanalaryn ornatyp, jaryq jalǵap beredi degen sóz. Kórsetilgen somany 11-ge bólsek, bir ǵana jaıaý júrginshiler jolyna elektr baǵandaryn ornatý jumysyna 1 mln 567 myń 690 teńge qarjy jumsalady eken.
Árıne, jaıaý júrginshiler jolyn jasaý, jaryqtandyrý qala turǵyndarynyń qaýipsizdigi úshin óte qajet. Biraq, Aqtóbe qalasyndaǵy jaıaý júrginshilerdiń 11 ótkeliniń ústine jaryqtandyrýǵa arnalǵan baǵandardy ornatý úshin bıýdjetten 17 mln 244 myń 591 teńge aqsha bólý kóp emes pe? Tehnıkalyq sıpattamada jumysshylardyń alatyn jalaqysy ǵana kórsetilgen. Sol jalaqy 251 myń 197 teńge dep belgilenipti. Iaǵnı, 17 mln 244 myń 591 teńgeni ıgerip, 11 ótkeldi jaryqtandyrý úshin kemi alpysqa jýyq maman jumysqa tartylýy kerek degen sóz. Sonda aqtóbelikter 11 dana jaıaý júrginshi jolyn jaryqtandyrý úshin alpys maman tartatyn bolǵany ma?
Bul suraqtardy tıisti mekemelerge joldadyq. Jaýap berilip jatsa, ony da jarııalaıtyn bolamyz.
Qanat Birlikuly
Adyrna ulttyq portaly
