Úkimet otyrysynda eldegi sý tasqynynyń saldaryn joıý máselesi qaraldy, dep habarlaıdy "Adyrna" ulttyq portaly.
QR Premer-Mınıstri Oljas Bektenovtiń tóraǵalyǵymen ótken májiliste vıe-premer Qanat Bozymbaev zalaldy óteý algorıtmine sáıkes óńirlerde atqarylyp jatqan is-sharalar týraly baıandady.
Otyrystaǵy málimetke súıensek, 28 mamyrǵa deıin respýblıka boıynsha 30 myńnan astam otbasy 100 AEK mólsherinde birjolǵy tólem alǵan. Sý tasyǵan aımaqtarda 15 myńnan astam úı men saıajaı qurylystary tekserilip, 11 134-i boıynsha baǵalaý júrgizildi.
Vıe-premer Batys Qazaqstan oblysynda sý basqan 4 myń úıdiń 2 176-i (54%) tekserilip, 770 úıge baǵalaý júrgizilgenin, Aqtóbe oblysynda 3 679 úı tekserilip (73%), 1673 úı baǵalanǵanyn málimdedi. Al Atyraý, Aqmola, Qostanaı jáne Soltústik Qazaqstan oblystarynyń ákimdikteri tasqynnan zaqymdanǵan úılerdi tekserý jáne baǵalaý jumystaryn aıaqtaǵan. Jalpy elimiz boıynsha 9 myńnan astam úı qalpyna keltirilýge bolatyn qurylys qataryna jatady. 4 315-i apatty jaǵdaıda dep tanylypty.
Bıyl óńirlerde 1 847 úı men páterdiń qurylysy bastalsa, qaıtalama naryqtan 3 417 turǵyn úı satyp alý josparlanyp otyr.
«Ákimdikterge Ónerkásip mınıstrligimen birge turǵyndardyń baspanalary men múlikterine keltirilgen zalaldy baǵalaý jumystaryn osy aptanyń sońyna deıin aıaqtaýdy tapsyramyn. Azamattarymyzdyń qıyn jaǵdaıyna túsinistikpen jáne jan-jaqty muqııat qarańyzdar. Jumystardy keshiktirmeı, barynsha tezdetý kerek. Qanat Aldabergenuly, qatań baqylaýda ustańyz», — dedi Úkimet basshysy Oljas Bektenov.
