«Qaraǵandy kóktemi» atty bul ádebı-rýhanı shara Qaraǵandy qalalyq jáne oblys ákimdiginiń qoldaýymen 2 jyl qatarynan uıymdastyrylyp ótkizilip otyr. Byltyr Qaraǵandy qalasynda alǵash ret ótkizilgen shara halyqaralyq deńgeıde ótti.
Negizgi maqsat – Arqa tórinde talantty jastardyń basyn qurap, búgingi ádebıettiń baǵytyn talqylaý. Sonymen qatar, qaraǵandylyq jas aqyn-jazýshylardyń áleýmettik máselelerin kóterý. Jastardyń shyǵarmashylyǵyn qoldaý jáne jańa serpin berý. Byltyr festıvalǵa kelesideı aqyndar arnaıy shaqyryldy: Ekber Qoşalı (Ázirbaıjan), Yılmaz Okuklu (Túrkııa), Selim Yuhay (Túrkııa), Hosııat Rýstamova (Ózbekstan), Ulyqbek Esdáýlet, Ǵalym Jaılybaı, Svetqalı Nurjan, Shahızada Ábdikárimov, Suraǵan Rahmetuly, Ǵazız Eshtanaev, Serik Elikbaı, Baýyrjan Babajanuly, Maraltaı Raıymbekuly, Dáýletkereı Kápuly, Baǵdat Múbárak, Tanakóz Tolqynqyzy, Qalqaman Sarın, Saǵynysh Namazshamova, Erbol Alshynbaı, Aıjan Tábárik, Mıras Asan t.b.
Al, bıyl «Qaraǵandy kóktemi» festıvali 15-16 mamyr aralyǵynda 2 kún boıy keshendi negizde ótkizilmek. Festıval baǵdarlamasy sheńberinde saltanatty ashylý rásimi, «Kreatıvti ındýstrııadaǵy qalamgerdiń róli, ıntellektýaldyq menshikti tıimdi satý joldary» taqyrybyndaǵy dóńgelek ústel uıymdastyrylmaq. Munymen birge, aqyndar kendi ólkeniń tynys-tirshiligimen etene tanysý úshin Qaraǵandy taý-ken ındýstrıaldyq kolledjiniń shahta murajaıyna saıahattaıdy. S. Seıfýllın atyndaǵy qazaq drama teatrynda «Qaraǵandy kóktemi» atty jyr keshi ótedi.
«Qaraǵandy kóktemi» festıvaliniń maqsat-muraty – aǵa býyn men jas býyn arasynda rýhanı baılanys ornatý. Aımaqtyń ádebı áleýetin arttyrý. Toqsan jyldyq tarıhy bar Qaraǵandy qalasynyń ımıdjine oń yqpal etý, rýhanııattyń aqzer álemine sony serpin berý. Bul shara aıasynda ádebıettiń búgini men erteńi, kreatıvti ekonomıkadaǵy el qazynasynyń múmkindigi jan-jaqty sarapqa salynbaq.
Poezııa festıvaliniń osy jolǵy qonaqtary retinde Maraltaı Raıymbekuly, Ularbek Nurǵalymuly, Tolqyn Qabylsha, Mereı Qart, Oljas Qasym, Nurdos Kárim, Araılym Muratálıeva, Mergen Toqsanbaı, Roza Aspan sekildi halyqqa keńinen belgili, talant ıeleri shaqyrtý aldy.
