Qazaqstandaǧy İran İslam Respublikasynyŋ Tötenşe jäne Ökılettı Elşısı BAQ ökılderımen kezdestı, dep habarlaidy "Adyrna" tılşısı QazAqparatqa sıltep.
İran elşısı Ali Akbar Djoukar eldegı ūlty qazaq azamattardyŋ Qazaqstanǧa qonys audaru mümkındıkterı turaly pıkır bıldırdı.
«İran men İzrail arasyndaǧy jaǧdai qaita uşyǧuy mümkın be? Sol maŋǧa sapar josparlaǧan, qazır ekı eldıŋ bırınde käsıp jürgızıp, oqu oqyp jürgen Qazaqstan azamattaryna Tegeran tarapynyŋ diplomaty retınde qandai keŋes beresız?» - dep sūrady BAQ ökılı.İran Elşısı qazır öz memleketınde jaǧdaidyŋ tūraqtalǧanyn aitady.
Kezdesu barysynda İrandaǧy qazaq diasporasynyŋ qazırgı ahualy söz boldy. Elşı qandai da bır elde äskeri, saiasi oqiǧalar bolǧan kezde mūndai mäselenıŋ ortaǧa şyǧuy qalypty jaǧdai dep esepteitının jetkızdı.«İzrailde jürgen qazaqstandyqtarǧa qatysty eşteŋe aita almaimyn. Al İranǧa kelsek, qazırgı taŋda bızdıŋ elde «İran EKSPO» deitın biylǧy eŋ ülken sauda-ekonomikalyq şara ūiymdastyrylǧan. Ol jerde 117 memlekettıŋ ökılderı, sonyŋ ışınde Qazaqstannan onnan astam adamnan qūralǧan delegasiia qatysyp jatyr. Keşe ǧana osy körme aiasynda İran men Qazaqstan käsıpkerlerınıŋ kezdesuı ötıp, adam mol jinaldy. Qysqasy, İranda jaǧdai qalypty», - dedı ol.
«Ondai mäsele är elde bolady. Mysaly, Qazaqstanda da daǧdarys jaǧdaiy bolsa, bızdegı azamattar da sondai mäseleler köteruı mümkın. Bıraq İranda jaǧdai qalypty, eşqandai qauıp joq. Halyqaralyq şaralardyŋ özı kestege sai ötedı. Elımızdegı şaralarǧa älem elderınıŋ 2 myŋnan astam ökılı qatysyp jatyr. İrannyŋ Gülstan provinsiiasynda ūlty qazaq irandyqtar tūratynyn bılesız. Ötken aptada sol jerde İran halyqtarynyŋ mädeni festivalı ötıp, ūlttyq taǧamdary, küres türlerı körsetıldı. Sondyqtan İranda eşqandai alaŋdauşylyq joq. Ol jaqta eşkımnıŋ eşqaida köşkısı kelmeidı. Qazır ekı eldıŋ arasynda 14 kündık vizasyz rejim bar. Sol arqyly ekı eldıŋ azamattary qalaǧan uaqyttarynda kelıp, kete alady. Sondyqtan İran qazaqtarynyŋ arasynda elden ketu turaly alaŋdauşylyq bar dep oilamaimyn. İzrailge qarsy äskeri operasiia bolyp jatqan kezde men İranda edım. Ol kezde de halyqtyŋ ışınde eşqandai alaŋdauşylyq bolǧan joq», - dedı Ali Akbar Djoukar.
Ūqsas jaŋalyqtar
