Álemge áıgili Netflix strımıngtik platformasy Qyrǵyzstan men Qazaqstanda týrıstik realıtı-shoý túsiriletinin habarlady. Almatyda jobanyń túsirilimi 20-30 mamyr aralyǵynda ótedi, dep habarlaıdy “Adyrna” ulttyq portaly.
Almaty Tourism Bureau baspasóz qyzmetiniń málimetinshe, jahandyq oıyn-saýyq ındýstrııasyndaǵy eń yqpaldy Netflix kompanııasy realıtı-týr shoý túsirý orny retinde Almatynyń ásem taýlary men qyrǵyz tabıǵatyn tańdaǵan.
Aıta keteıik, Netflix - keń aýdıtorııaǵa fılmder men telehıkaıalardyń úlken tańdaýyn usynatyn jáne óte tanymal jetekshi aǵyndy platforma.
Aýdıtorııasy álem boıynsha jarty mıllıardtan astam adamdy quraıdy. Netflix-tiń 270 mıllıonǵa jýyq aqyly jazylýshysy bar.
Sondyqtan Almatyda týrıstik realıtı-shoýdy túsirý – eldi tanýǵa jáne týrıstik áleýetti arttyrýǵa yqpal etetin mańyzdy «kapıtal» bolmaq. Jobanyń júzege asýy Almaty týrıstik bıýrosynyń komandasy men Qyrǵyzstannyń prodıýserlik kompanııasynyń yntymaqtastyǵynyń nátıjesinde bolady.
