Almatyda Tólebaev kóshesindegi covettik Qazaqstan basshysy Dinmuhamed Qonaev turǵan úı satylýda degen aqparat tarady. Bul qanshalyqty shyndyqqa janasady? “Adyrna” ulttyq portaly anyq-qanyǵyn bildi.
krisha.kz portalynda Tólebaev kóshesi 119 úıdegi páterdi satý týraly habarlandyrý paıda boldy. 509 mıllıon 400 myń teńgege baǵalanǵan 15 bólmeli páterdiń aýdany 566 sharshy metrdi quraıdy. Satylatyn múliktiń jóndeýdi qajet etetini atap ótilgen.
«Altyn sharshy. Tarıhı jer. Jeke kireberisi bar páter, 2 qabat, sonymen qatar jertóle, aýlada jeke avtoturaǵy bar. Ár qabatta jýynatyn bólme bar. Jóndeýdi qajet etedi. Bul aımaqtyń ınfraqurylymy óte damyǵan. Jaqyn jerde opera teatry, sýburqaqtar, saıabaq alańdary, «Stolıchnyı» dúkeni, ártúrli profıldegi mektepter men gımnazııalar, bank fılıaldary, sondaı-aq bos ýaqytty ótkizýge arnalǵan kóp oryndar bar. Baǵasyn kelisýge bolady», - delingen jarnama mátininde.
Sol ǵımaratta Dinmuhamed Qonaevtyń memorıaldyq murajaı-páteri ornalasqan. Munda ol 1969-1993 jyldar aralyǵynda ómir súrgen. Satylyp jatqan D.Qonaev turǵan páter emes. Bul jóninde murajaıdyń baspasóz qyzmeti jaýap berdi.
“Satylymǵa shyǵarylǵan páterler Tólebaev kóshesi, 119 mekenjaıdaǵy úıdiń birinshi kireberisinde ornalasqan. Al, Qonaevtyń páteri (Qonaevtyń memorıaldy mýzeıi) osy úıdiń ekinshi kireberisinde ornalasqan. Qonaevtyń memorıaldy mýzeıi Almaty qalasynyń mýzeıler birlestigi» memlekettik qazynalyq kásipornynyń balansynda jáne megapolıstegi kelýshiler sany boıynsha aldyńǵy qatardaǵy mýzeılerdiń biri bolyp tabylady»,- delingen habarlamada.
«Jelide mýzeı-páterdi satýǵa qatysty taralyp jatqan aqparat shyndyqqa janaspaıdy. Qurmetti BAQ ókilderi jáne jeli paıdalanýshylary, tekserilmegen ári jalǵan aqparatty jarysa jarııalamaýlaryńyzdy suraımyz»,- dep qosqan mýzeıdiń baspasóz qyzmeti.
Aıta keteıik, bul páterde 90-shy jyldary Qazaqstannyń tuńǵysh prezıdenti Nursultan Nazarbaev ta turǵan. Bul týraly jýrnalıst Rasýl Rysmambetov Facebook paraqshasynda atap ótti.
“Satylyp jatqan Qonaevtyń murajaı-úıi emes. Bári shatastyrýda. Kezinde Qazaq KSR-i men Qazaqstandaǵy eń mańyzdy páter satylýda, biraq ony satýǵa jáne jeke menshikke berýge bolmaıdy dep oılaımyn. Bul úıde Dinmuhamed Ahmeduly Qonaev turǵan. Satylatyn páterde 90-shy jyldary Nursultan Nazarbaev ta turǵan. Bul páter de, úıler de tarıhı sıpatqa ıe. Endi oǵan Qasym-Jomart Kemelulynyń atyna tirkelý kezegi kelgendeı...”- dep jazdy Rasýl Rysmambetov.
Úıdi satýǵa arnalǵan habarlandyrý avtory - «Alma-Invest-Holdıng» JShS. Kompanııany Aleksandra haı Iýrevna basqarady. Kompanııanyń quryltaıshylary týraly naqty málimet joq.
Budan bólek, Aleksandr haıdyń atynda «AB Agro Invest» JShS jáne «Darın Konstrakshn» JShS kompanııalary bar. Shishkin_like Telegram arnasynyń habarlaýynsha, alǵashqy quryltaıshylar Darıǵa Nazarbaeva men onyń marqum uly Aısultan Nazarbaev bolǵan.
Qazaqstannyń ilgerindi-keıindi basshylary paıdalandy degen qymbat múlikter týraly budan buryn da aıtylǵan. Budan aldyn Dinmuhamed Qonaev qorynyń qyzmetkerleri belgili kásipker Keńes Raqyshevtyń Qazaqstan Kompartııasy Ortalyq Komıtetiniń birinshi hatshysynyń kóligin jekeshelendirip alǵanyn jáne ony qaıtaryp bermeı otyrǵanyn málimdegen.
Al Tuńǵysh prezıdent Nursultan Nazarbaevtyń alǵashqy kóligi delingen Mercedes 600 SEL (Sonderschutz) GUARD B7 avtokóligi satylymda júrgenin jarııalaǵan edik. Atalǵan kólik áli satylmasa kerek, saıt betinen jarnamasy áli alynbaǵan.
”Adyrna” ulttyq portaly
