Qazaqstan prezidentı Armeniia premer-ministrımen şaǧyn qūramda kelıssöz jürgızdı. Būl turaly Aqorda jariialady, dep habarlaidy “Adyrna” ūlttyq portaly.
Qasym-Jomart Toqaev būl resmi saparyna erekşe män beretının jäne ony ekıjaqty qarym-qatynastardy damytudyŋ maŋyzdy kezeŋıne jol aşatynyn atap öttı. Qazaqstan prezidentı ekı el arasyndaǧy bailanystardyŋ barlyq baǧyty boiynşa yntymaqtastyqty arttyru üşın mol äleuet bar ekenın aitty.
Nikol Paşinian özara bailanystardyŋ qarqyndy damyp kele jatqanyna toqtalyp, armian-qazaq qatynastaryn jaŋa deŋgeige köteru üşın bırlese äreket etuge daiyn ekenın mälımdedı.
Kelıssöz barysynda Qasym-Jomart Toqaev pen Nikol Paşinian sauda-ekonomikalyq, kölık-tranzittık, investisiialyq, öŋırlık jäne mädeni-gumanitarlyq yntymaqtastyq mäselelerın talqylady. Taraptar öŋırlık tūraqtylyq jäne qauıpsızdık mäselelerıne airyqşa nazar audardy.
Şaǧyn formatta ötken kelıssöz soŋynda Qasym-Jomart Toqaev pen Nikol Paşinian Qazaqstan men Armeniia arasyndaǧy köpqyrly bailanystardy odan ärı nyǧaituǧa beiıldı ekenın rastady.
Atap aitqanda, Qazaqstan prezidentınıŋ Erevanǧa resmi sapary aiasynda mynadai qūjattarǧa qol qoiyldy:- Qazaqstan Ükımetı men Armeniia Ükımetı arasyndaǧy köşı-qon salasyndaǧy yntymaqtastyq turaly kelısım;
- Qazaqstan Ükımetı men Armeniia Ükımetı arasyndaǧy azamattardyŋ saparlary men bolu tärtıbı turaly kelısım;
- 2006 jylǧy 6 qaraşadaǧy Qazaqstan Ükımetı men Armeniia Ükımetı arasyndaǧy halyqaralyq avtomobil qatynasy turaly kelısımge özgerıster men tolyqtyrular engızu turaly hattama;
- Qazaqstan men Armeniianyŋ aviasiialyq bilıgı arasyndaǧy özara tüsınıstık turaly memorandum;
- Qazaqstannyŋ Maŋǧystau oblysy äkımınıŋ apparaty men Armeniianyŋ Armavir oblysy äkımşılıgı arasyndaǧy yntymaqtastyq turaly memorandum;
- Qazaqstannyŋ Şymkent qalasy men Armeniianyŋ Vanadzor qalasy arasyndaǧy yntymaqtastyq jäne bauyrlastyq qarym-qatynas ornatu turaly memorandum;
- Qazaqstannyŋ Turizm jäne sport ministrlıgı men Armeniianyŋ Bılım, ǧylym, mädeniet jäne sport ministrlıgı arasyndaǧy 2024-2026 jyldarǧa arnalǧan yntymaqtastyq baǧdarlamasy;
- Qazaqstan Ükımetı men Armeniia Ükımetı arasyndaǧy sauda-ekonomikalyq yntymaqtastyq jönındegı 2024-2025 jyldarǧa arnalǧan Jol kartasy;
- Qazaqstannyŋ Sifrlyq damu, innovasiialar jäne aeroǧaryş önerkäsıbı ministrlıgı men Armeniianyŋ Joǧary tehnologiialyq industriia ministrlıgı arasyndaǧy aqparattyq kommunikasiialyq tehnologiialar salasyndaǧy yntymaqtastyq turaly özara tüsınıstık turaly memorandum;
- Astana men Erevan arasyndaǧy bauyrlastyq qarym-qatynas ornatu turaly memorandum.
Aita keteiık, bügın Qasym-Jomart Toqaev Armeniiaǧa resmi saparmen bardy. Armeniianyŋ memlekettık rezidensiiasynda Erevanǧa resmi saparmen kelgen Qazaqstan prezidentın saltanatty türde qarsy alu räsımı öttı.
