Taıvannyń shyǵys jaǵalaýynda birneshe qatty jer silkinisi boldy. Jerasty dúmpýinen keıbir ǵımarattar qırap qalǵan dep habarlaıdy "Adyrna" portaly halyqaralyq BAQ-qa siltep.
AQSh Geologııalyq qyzmetiniń málimetinshe, jer silkinisiniń oshaǵy Taıvannyń Hýalıen qalasynan ońtústikke qaraı 18 shaqyrym jerde ornalasqan. Seısmologtardyń aıtýynsha, bul Taıvanda sońǵy 25 jylda bolǵan eń kúshti jer silkinisi.
Japonııanyń bas meteorologııalyq agenttiginiń málimetinshe, magnıtýdasy 7,5 bolatyn birinshi jer silkinisi 3 sáýir kúni, Astana ýaqytymen tańǵy 04:58-de Taıvannyń shyǵys jaǵalaýynda tirkelgen. Jer silkinisiniń tereńdigi áli anyqtalǵan joq, tek onyń sý astynda «óte taıaz tereńdikte» bolǵany anyqtaldy.
Arada 15 mınýt ótpeı – 5 saǵat 11 mınýtta – sol jerde magnıtýdasy 6,6 bolatyn jer silkinisi boldy. Jer silkinisiniń tereńdigi taǵy da «óte taıaz» ekeni anyqtaldy.
Osy aımaqta tańǵy saǵat 5:35-te magnıtýdasy 6,3 bolatyn úshinshi jer silkinisi tirkeldi. Jer silkinisiniń oshaǵy sý astynda 20 shaqyrym tereńdikte ornalasqan.
Basylym jer silkinisiniń Japonııanyń ońtústigindegi Okınava prefektýrasynda da sezilgenin jazady. Jer silkinisinen keıin Okınava, Mııako jáne Iaeıama araldary tobyna ýnamı qaýpi tóndi. Japon mamandary tolqynnyń bıiktigi úsh metrge jetýi múmkin ekenin joqqa shyǵarmaıdy.
Áleýmettik jelilerde tótenshe jaǵdaı oryn alǵan vıdeolar paıda boldy. Kadrlarda búlingen ǵımarattar, sondaı-aq jer asty dúmpýleriniń sáti túsirilgen.
Ázirge qaza tapqandar men zardap shekkender týraly málimet joq.
