Nur-Sultanǵa jańa ákim Altaı KÓLGINOVTIŃ kelýimen ákimdiktegi mebelder men kreslolar da jańaryp jatyr. Kólginov kele salyp kreslolar men mebelderge mıllıondar jumsaýdy josparlap otyr.
Qazaqstan Respýblıkasynyń memlekettik satyp alýlary veb-portalyndaǵy málimetke qaraǵanda, Astana qalasy ákimdigi ázirge 4 dana «bastyq kreslosyn», 2 dana «basshy bólmesiniń jıhazyn» satyp almaq. Osynyń ózine ketetin shyǵyn – 4 mıllıon teńgege jýyq.
Atap aıtsaq, bastyq kreslosynyń ár danasyna 210 myń 151 teńge (210 151.78 teńge); al basshy kabıneti úshin jıhazdyń ár danasyna 1 540 285 teńge (1 540 285,71 teńge) jumsalmaq. Nátıjesinde mebel aýystyrý úshin ǵana ákimdik 3 921 178,54 teńge jumsamaq bolyp otyr.
Ergonomıkalyq pishindegi, bıiktigi 75 sm bolatyn ústel men ústelge qoıatyn tireýish, mobıldi qondyrǵynyń bólshekteri; shkaftar, t.b. – bular «basshy kabınetine arnalǵan mebelderge» jatady. Bul mebelderge qoıylatyn talaptar arnaıy qujatta bekitilgen.
Odan bólek kreslo. Kresloǵa qoıylatyn talaptyń negizgisi -- 120 kg deıin salmaq kótere alýy. Bul kreslolardyń naqty qaı basshyǵa arnalǵany belgisiz, dese de osy talap negizinde buǵan otyratyn tórt sheneýniktiń de salmaǵy 120-dan aspaıtyny túsinikti. Múmkin, bul tórteýdiń biri Kólginovtiń ózi bolýy da múmkin. Mynadaı talapqa saı kreslonyń qala ákimin erkin kóteretini anyq.
Qujattaǵy kresloǵa qoıylatyn talaptar mynadaı:
«Botıellıdiń DB-13 basshysyna arnalǵan kreslo – tireýish mehanızmi joq, salmaq shekteýleri: 120 kg, negizi: aǵash, jaqtaý: monolıtti emes, óndirýshi: Reseı qolǵaptary: bıiktigi boıynsha retteý. Taýarlardyń kólemi 130 h 63 h 71, qorap mólsheri 94 x 80 x 65. Óndirýshi eli Reseı. Maks 120 kg júkteý. Túsi tapsyrys berýshimen kelisiledi».
Konkýrstyq qujattamaǵa satyp alynatyn taýarlardyń tehnıkalyq ereksheligi qysqasha aıtqanda shamamen osy. № 3484117-1 jáne № 3484304-1 satyp alý boıynsha jarııalanǵan konkýrsty qala ákimdigi qashan aıaqtaıtyny belgisiz. Óıtkeni, shartta satyp alý men ony ornatý merzimi – «kelisimge sáıkes" ekeni kórsetilgen.
Maqala "Jas Alash" gazetinen alyndy
"Adyrna" ulttyq portaly
