Búgin - Qazaq radıosynyń tanymal dıktory, Halyq ártisi Ánýarbek Baıjanbaevtyń týǵanyna 101 jyl toldy, dep habarlaıdy "Adyrna" tilshisi.
Ol 1923 jyly 26 naýryzda Semeıde ómirge kelgen. Shyńǵystaýdyń bókterinde týyp-ósken Ánýarbek Nyǵmetjanuly dana Abaıdyń aýyldasy bolǵan.
1939-1941 jyldary Almatyda Kommýnıstik jýrnalıstıka ınstıtýtynda bilim alyp, 1941 jyly soǵys bastalǵanda alǵashqylardyń biri bolyp maıdanǵa attanǵan. Alaıda 1943 jyly aıaǵynan qatty jaraqat alyp, elge qaıtqan.
Keıinnen 1944 jyly Qazaq radıosyna dıktorlyq qyzmetke qabyldanyp, ómiriniń sońyna deıin osy salada qyzmet etti. Maıdan habarlaryn áýe tolqynynda oqyǵanda kóńili tolqyp, keıde tipti kózine jas ta keletin Ánýarbek Baıjanbaev – 1945 jyly kóp kúttirgen Jeńis habaryn Levıtannan keıin efırde qazaq tilinde alǵash súıinshilegen dıktor.
Ánýarbek Baıjanbaev týraly áriptesi Saýyq Jaqanova da pikir bildirgen.
"Ánýarbek aǵamen Qazaq radıosynda birge qyzmet istedik. Tabıǵatynan qarapaıym, adal, sengish, aqkóńil jan bolatyn. Aǵa ekeýmiz kezinde balalarǵa arnalǵan «Pıoner serigi» atty baǵdarlamany júrgizgen edik. Bul meniń sol kezdegi alǵashqy baǵdarlamam bolatyn. Sol sebepti habar barysynda kóńilim tolqyp, daýsymnyń dirildeı bastaǵanyn sezgen Ánekeń meni jigerlendirip, demeý kórsetken. Ánekeńniń qoldaýymen namysyma tyrysyp, baǵdarlamany ary qaraı júrgizgenim áli esimde. Uly bola tura, únemi kishireıip júretin. Júregi óte jumsaq adam edi, ony men Ánekeńniń soǵys týraly habarlardy oqyǵanynan baıqadym. Qan maıdannyń habaryn oqyǵanda tebirenip, erekshe bir kúıge enetin. Daýysy qoıýlaý, qońyr daýys edi.
Ánekeńniń jurtqa qamqorlyǵy, janashyrlyǵy erekshe bolatyn. Sol ýaqytta elimizdiń túkpir-túkpirinen Ánýarbek Baıjanbaevqa arnaıy hattar aǵylyp kelip jatatyn. Ol kezde jeńil kólik alý, balany oqýǵa túsirý degen qıyndaý-tuǵyn. Sol sebepti de úlken kisiler: «Qaraǵym Ánýarbek, jınaǵan az-maz tıyn-tebenim bar edi. Sen anaý Qonaevtyń janynda júresiń, sol kisiniń sózin sóıleısiń, sóziń ótedi ǵoı, mashına alýǵa kómektesshi» nemese «balamdy oqýǵa túsirip bershi» dep, túrli-túrli ótinishterin joldaıtyn, kómek surap aldyna keletin. Ánekeń osy kisilerdiń birde-bireýin keri qaıtarǵan emes. Qolynan kelgenshe el-jurtqa kómegin berip, qamqorlyq jasaıtyn. Biletinimdi osy Ánekeńniń mektebinen úırendim. Sol kezderde bir ǵana radıomen búkil qazaq dalasyna habar taratamyz. Kúni-túni radıoda júrse de sharshaǵanyn kórgen emespin. Maǵan aǵalyq qoldaý bildirip júretin", - dedi dıktor Saýyq Jaqanova.
Saýyq Jaqanovanyń sózinshe kópshilik Ánýarbek Baıjanbaevty "qazaqtyń Levıtany" dese, kerisinshe Baıjanbaev: "Saýyq, sen efırdiń Aqbaıanysyń" degen eken.
