بۇگىن - قازاق راديوسىنىڭ تانىمال ديكتورى، حالىق ءارتىسى ءانۋاربەك بايجانباەۆتىڭ تۋعانىنا 101 جىل تولدى، دەپ حابارلايدى "ادىرنا" ءتىلشىسى.
ول 1923 جىلى 26 ناۋرىزدا سەمەيدە ومىرگە كەلگەن. شىڭعىستاۋدىڭ بوكتەرىندە تۋىپ-وسكەن انۋاربەك نىعمەتجانۇلى دانا ابايدىڭ اۋىلداسى بولعان.
1939-1941 جىلدارى الماتىدا كوممۋنيستىك جۋرناليستيكا ينستيتۋتىندا ءبىلىم الىپ، 1941 جىلى سوعىس باستالعاندا العاشقىلاردىڭ ءبىرى بولىپ مايدانعا اتتانعان. الايدا 1943 جىلى اياعىنان قاتتى جاراقات الىپ، ەلگە قايتقان.
كەيىننەن 1944 جىلى قازاق راديوسىنا ديكتورلىق قىزمەتكە قابىلدانىپ، ءومىرىنىڭ سوڭىنا دەيىن وسى سالادا قىزمەت ەتتى. مايدان حابارلارىن اۋە تولقىنىندا وقىعاندا كوڭىلى تولقىپ، كەيدە ءتىپتى كوزىنە جاس تا كەلەتىن انۋاربەك بايجانباەۆ – 1945 جىلى كوپ كۇتتىرگەن جەڭىس حابارىن لەۆيتاننان كەيىن ەفيردە قازاق تىلىندە العاش سۇيىنشىلەگەن ديكتور.
انۋاربەك بايجانباەۆ تۋرالى ارىپتەسى ساۋىق جاقانوۆا دا پىكىر بىلدىرگەن.
"انۋاربەك اعامەن قازاق راديوسىندا بىرگە قىزمەت ىستەدىك. تابيعاتىنان قاراپايىم، ادال، سەنگىش، اقكوڭىل جان بولاتىن. اعا ەكەۋمىز كەزىندە بالالارعا ارنالعان «پيونەر سەرىگى» اتتى باعدارلامانى ءجۇرگىزگەن ەدىك. بۇل مەنىڭ سول كەزدەگى العاشقى باعدارلامام بولاتىن. سول سەبەپتى حابار بارىسىندا كوڭىلىم تولقىپ، داۋسىمنىڭ دىرىلدەي باستاعانىن سەزگەن انەكەڭ مەنى جىگەرلەندىرىپ، دەمەۋ كورسەتكەن. انەكەڭنىڭ قولداۋىمەن نامىسىما تىرىسىپ، باعدارلامانى ارى قاراي جۇرگىزگەنىم ءالى ەسىمدە. ۇلى بولا تۇرا، ۇنەمى كىشىرەيىپ جۇرەتىن. جۇرەگى وتە جۇمساق ادام ەدى، ونى مەن انەكەڭنىڭ سوعىس تۋرالى حابارلاردى وقىعانىنان بايقادىم. قان مايداننىڭ حابارىن وقىعاندا تەبىرەنىپ، ەرەكشە ءبىر كۇيگە ەنەتىن. داۋىسى قويۋلاۋ، قوڭىر داۋىس ەدى.
انەكەڭنىڭ جۇرتقا قامقورلىعى، جاناشىرلىعى ەرەكشە بولاتىن. سول ۋاقىتتا ەلىمىزدىڭ تۇكپىر-تۇكپىرىنەن انۋاربەك بايجانباەۆقا ارنايى حاتتار اعىلىپ كەلىپ جاتاتىن. ول كەزدە جەڭىل كولىك الۋ، بالانى وقۋعا ءتۇسىرۋ دەگەن قيىنداۋ-تۇعىن. سول سەبەپتى دە ۇلكەن كىسىلەر: «قاراعىم انۋاربەك، جيناعان از-ماز تيىن-تەبەنىم بار ەدى. سەن اناۋ قوناەۆتىڭ جانىندا جۇرەسىڭ، سول كىسىنىڭ ءسوزىن سويلەيسىڭ، ءسوزىڭ وتەدى عوي، ماشينا الۋعا كومەكتەسشى» نەمەسە «بالامدى وقۋعا ءتۇسىرىپ بەرشى» دەپ، ءتۇرلى-ءتۇرلى وتىنىشتەرىن جولدايتىن، كومەك سۇراپ الدىنا كەلەتىن. انەكەڭ وسى كىسىلەردىڭ بىردە-بىرەۋىن كەرى قايتارعان ەمەس. قولىنان كەلگەنشە ەل-جۇرتقا كومەگىن بەرىپ، قامقورلىق جاسايتىن. ءبىلەتىنىمدى وسى انەكەڭنىڭ مەكتەبىنەن ءۇيرەندىم. سول كەزدەردە ءبىر عانا راديومەن ءبۇكىل قازاق دالاسىنا حابار تاراتامىز. كۇنى-ءتۇنى راديودا جۇرسە دە شارشاعانىن كورگەن ەمەسپىن. ماعان اعالىق قولداۋ ءبىلدىرىپ ءجۇرەتىن", - دەدى ديكتور ساۋىق جاقانوۆا.
ساۋىق جاقانوۆانىڭ سوزىنشە كوپشىلىك انۋاربەك بايجانباەۆتى "قازاقتىڭ لەۆيتانى" دەسە، كەرىسىنشە بايجانباەۆ: "ساۋىق، سەن ەفيردىڭ اقبايانىسىڭ" دەگەن ەكەن.
