Qorǵanys mınıstri Ermekbaev ermekke aıta salǵan sózinen keıin ornyn bosatýy tıis!

69

«Bizde bári de bola beredi» degen maqalymdy maqamdatyp kóp aıtýshy edim… Sol beker bolǵan sııaqty… «Jyndynyń sandyraǵy keledi» degen ras boldy…

Arystaǵy tórtkúl dúnıeni dúr silkindirgen tórtinshi jarylystyń daýysy basqa-basqa, osy apatqa tikeleı jaýapty Qorǵanys mınıstrin uıqydan oıata almapty..

Qorǵanys mınıstri Nurlan Ermekbaev «Arystaǵy apat úshin Qorǵanys mınıstrliginiń keshirim suraýyna negiz joq. Bul qarý-jaraqtardyń jarylýy tabıǵı qubylys»-dep soǵypty.. Úsh adamnyń ómirin qıǵan, júzdegen adam jaralanǵan, al Arys qalasynyń úıleri qırap, adamdary túgel kóshirilgen alapat apatqa keshirim suramaǵan Qorǵanys mınıstri kimge kerek? Ózge, ózin-ózi syılaıtyn damyǵan elderde mundaı oqıǵanyń júzden biri bolǵannyń ózinde qorǵanys mınıstri óz erkimen otstavkaǵa ketedi.

O zamanda, bu zaman atamzamannan Arystyń irgesinen aýlaqqa áketilmeı jatqan qoımalardaǵy áskerı qarý-jaraq áskerılerdiń jaýapsyzdyǵynan jarylyp ketken adam aıtqyzyz alapat apatty «tabıǵattyń isi» dep Qudaıǵa aýdara salǵan mınıstrdi kim kórgen?!. Balalaryn arqalap, qyrǵa jalańaıaq, jalańbas jaıaý qashqan analar, áke-sheshesinen aıyrylyp qap shyryldaǵan balalar, jaýyp jatqan oqtan qashamyn dep sharshap-shaldyqqan shal-kempirlerdiń kúızelisi men úsh adamnyń ólimi sonda qorǵanys mınıstrine shybyn shaqqan ǵurly áser etpeı tur ǵoı.

Qazaqstannyń Qorǵanys mınıstri xalyqtan keshirim suraý úshin endi qandaı jarylys, qansha adam qaza tabýy kerek?!.

Ermekbaev myrzanyń xalyqtan keshirim suraýdyń ornyna xalyqtan qashqan myna tirligine, mynadaı masqara sózine qaraǵanda bul myrza Halyqtan qorǵanys mınıstri bolyp isteıtin bolýy kerek…

Ana jyly Imanǵalı Tasmaǵambetov Qorǵanys mınıstri bolǵanda men bir-aq sóılemnen turatyn maqala jazdym. Imekeńniń úlken sýretin bastym da: «ENDI TYNYSh UIYQTAP, ALAŃSYZ OIaNATYN BOLDYM!» – dedim.

Endi Qorǵanys mınıstri Ermekbaevtyń ermekke aıta salǵan myna qorqynyshty sózinen keıin de, bir-aq sóılemmen sózimdi aıaqtaımyn:

– ENDI QALAI TYNYSh UIYQTAIMYZ?!.

 

https://www.instagram.com/p/Bzc7odeB8wP/

 

Qazybek ISA
"Adyrna" ulttyq portaly
Pikirler