قورعانىس ءمينيسترى ەرمەكباەۆ ەرمەككە ايتا سالعان سوزىنەن كەيىن ورنىن بوساتۋى ءتيىس!

70

«بىزدە ءبارى دە بولا بەرەدى» دەگەن ماقالىمدى ماقامداتىپ كوپ ايتۋشى ەدىم… سول بەكەر بولعان سياقتى… «جىندىنىڭ ساندىراعى كەلەدى» دەگەن راس بولدى…

ارىستاعى تورتكۇل دۇنيەنى ءدۇر سىلكىندىرگەن ءتورتىنشى جارىلىستىڭ داۋىسى باسقا-باسقا، وسى اپاتقا تىكەلەي جاۋاپتى قورعانىس ءمينيسترىن ۇيقىدان وياتا الماپتى..

قورعانىس ءمينيسترى نۇرلان ەرمەكباەۆ «ارىستاعى اپات ءۇشىن قورعانىس مينيسترلىگىنىڭ كەشىرىم سۇراۋىنا نەگىز جوق. بۇل قارۋ-جاراقتاردىڭ جارىلۋى تابيعي قۇبىلىس»-دەپ سوعىپتى.. ءۇش ادامنىڭ ءومىرىن قيعان، جۇزدەگەن ادام جارالانعان، ال ارىس قالاسىنىڭ ۇيلەرى قيراپ، ادامدارى تۇگەل كوشىرىلگەن الاپات اپاتقا كەشىرىم سۇراماعان قورعانىس ءمينيسترى كىمگە كەرەك؟ وزگە، ءوزىن-ءوزى سىيلايتىن دامىعان ەلدەردە مۇنداي وقيعانىڭ جۇزدەن ءبىرى بولعاننىڭ وزىندە قورعانىس ءمينيسترى ءوز ەركىمەن وتستاۆكاعا كەتەدى.

و زاماندا، بۇ زامان اتامزاماننان ارىستىڭ ىرگەسىنەن اۋلاققا اكەتىلمەي جاتقان قويمالارداعى اسكەري قارۋ-جاراق اسكەريلەردىڭ جاۋاپسىزدىعىنان جارىلىپ كەتكەن ادام ايتقىزىز الاپات اپاتتى «تابيعاتتىڭ ءىسى» دەپ قۇدايعا اۋدارا سالعان ءمينيستردى كىم كورگەن؟!. بالالارىن ارقالاپ، قىرعا جالاڭاياق، جالاڭباس جاياۋ قاشقان انالار، اكە-شەشەسىنەن ايىرىلىپ قاپ شىرىلداعان بالالار، جاۋىپ جاتقان وقتان قاشامىن دەپ شارشاپ-شالدىققان شال-كەمپىرلەردىڭ كۇيزەلىسى مەن ءۇش ادامنىڭ ءولىمى سوندا قورعانىس مينيسترىنە شىبىن شاققان عۇرلى اسەر ەتپەي تۇر عوي.

قازاقستاننىڭ قورعانىس ءمينيسترى xالىقتان كەشىرىم سۇراۋ ءۇشىن ەندى قانداي جارىلىس، قانشا ادام قازا تابۋى كەرەك؟!.

ەرمەكباەۆ مىرزانىڭ xالىقتان كەشىرىم سۇراۋدىڭ ورنىنا xالىقتان قاشقان مىنا تىرلىگىنە، مىناداي ماسقارا سوزىنە قاراعاندا بۇل مىرزا حالىقتان قورعانىس ءمينيسترى بولىپ ىستەيتىن بولۋى كەرەك…

انا جىلى يمانعالي تاسماعامبەتوۆ قورعانىس ءمينيسترى بولعاندا مەن ءبىر-اق سويلەمنەن تۇراتىن ماقالا جازدىم. يمەكەڭنىڭ ۇلكەن سۋرەتىن باستىم دا: «ەندى تىنىش ۇيىقتاپ، الاڭسىز وياناتىن بولدىم!» – دەدىم.

ەندى قورعانىس ءمينيسترى ەرمەكباەۆتىڭ ەرمەككە ايتا سالعان مىنا قورقىنىشتى سوزىنەن كەيىن دە، ءبىر-اق سويلەممەن ءسوزىمدى اياقتايمىن:

– ەندى قالاي تىنىش ۇيىقتايمىز؟!.

 

https://www.instagram.com/p/Bzc7odeB8wP/

 

قازىبەك يسا
"ادىرنا" ۇلتتىق پورتالى
پىكىرلەر