5 synyp oqýshysynyń jýsan ıisi saqtalǵan átir shyǵarǵany aıtyldy, dep habarlaıdy "Adyrna" tilshisi Atameken Business-ke siltep.
Aqmola oblysy Aqkól aýdanyndaǵy Keńes aýylynyń 5-synyp oqýshysy Albına Aıdarhanova úzdik dep tanyldy.
Ol ustazymen birge qazaq dalasynyń hosh ıisi saqtalǵan átir shyǵarǵan. Orta synyp oqýshysyn erekshe hosh ıis jasaýǵa Sultan Beıbarys týraly ańyzdaǵy "Jýsanda týǵan jerdiń ıisi bar" degen qanatty sózi shabyttandyrǵan.
"Biz úı jaǵdaıynda átir jasaý tásilderin zerttedik. Alǵan bilimderimizdi praktıkada qoldaný barysynda jýsannyń san túrin anyqtadyq. Eger átirdiń negizgi notasy retinde gúlder qoldanylsa, biz onyń ornyna qarapaıym jýsandy tańdadyq. Sebebi onyń tunbasy tábetti jaqsartady, asqazan-ishek joldarynyń qyzmetin nyǵaıtady, júıke júıesin tynyshtandyrady, túrli shanshý men qurysýlardy, aýyrsynýdy basady, tipti tynysh uıqyǵa septigin tıgizedi", – deıdi joba jetekshisi, bastaýysh synyp muǵalimi Jupar Ahmetova.
Oqýshy oılap tapqan hosh ıis "Elim-aı" dep atalady. Jas ónertapqysh átirdiń ataýy elimizdiń mádenıetine degen súıispenshilikpen baılanysty ekenin aıtady.
