6 nauryz künı Memleket basşysy Qasym-Jomart Toqaev Işkı ıster ministrı Erjan Sädenovty qabyldady, dep habarlaidy "Adyrna" ūlttyq portaly "Aqorda" saityna sıltep.
Prezidentke elımızde «Zaŋ jäne tärtıp» qaǧidatyn ornyqtyru, kez kelgen qūqyq būzuşylyqqa müldem tözbeuşılık jaǧdaiyn qalyptastyru maqsatynda jürgızılıp jatqan jūmystar jönınde esep berıldı.
Erjan Sädenov vedomstvo öz qyzmetı barysynda Memleket basşysynyŋ Işkı ıster ministrlıgınıŋ keŋeitılgen alqa otyrysynda bergen tapsyrmalaryna säikes qūqyq būzuşylyqtyŋ aldyn alu jäne azamattardyŋ qūqyqtyq sauatyn arttyru mäselelerıne basa män berıp otyrǧanyn baiandady. Sonyŋ nätijesınde jyl basynan berı qylmys deŋgeiı tömendegen. Atap aitqanda, ūrlyq, tonau, qaraqşylyq, sondai-aq otbasylyq-tūrmystyq jäne köşede jasalǧan qylmystar, kämeletke tolmaǧan jäne būryn sottalǧan azamattar ıstegen qylmystar aitarlyqtai azaiǧan.
Memleket basşysyna qūqyq būzuşylyqtyŋ aldyn aluǧa baǧyttalǧan bıryŋǧai zaŋ äzırleu, tūrmystyq zorlyq-zombylyqqa qarsy küres jönınde arnaiy bölımşe qūru üşın qabyldanyp jatqan şaralar turaly mälımet berıldı.
Būdan bölek, Prezidentke ūiymdasqan qylmysqa, esırtkı qylmysyna, ekstremizmge qarsy ıs-qimyl jūmystarynyŋ nätijesı tanystyryldy. Ministr kiberqylmysqa qarsy küres jürgızetın derbes qyzmet qūrylatynyn jetkızdı.
Sonymen qatar Erjan Sädenov orta buynǧa jatatyn basşylyq qūramdy kezekten tys attestattasiiadan ötkızuge daiyndyq barysy jaiynda aitty.
Kezdesu soŋynda Qasym-Jomart Toqaev elımızdegı qūqyqtyq tärtıp pen qoǧamdyq qauıpsızdık deŋgeiın odan ärı arttyru jönınde bırqatar naqty tapsyrma berdı.
Ūqsas jaŋalyqtar
