Memleket basşysy Qasym-Jomart Toqaev qazaqstandyqtardy mädeniettı, sabyrly bolyp, daŋǧaza men aiqai-şuǧa jol bermeuge şaqyrdy. Būl turaly Prezident bügın VI Düniejüzılık köşpendıler oiyndary jeŋımpazdaryn marapattau räsımınde aitty, dep habarlaidy “Adyrna”.
Astanada, Täuelsızdık saraiynda ötken jiynda Prezident Toqaev bükıl älem türkı halyqtaryna köz tıgıp otyrǧanyn alǧa tartyp, būl jarysty bırlese damytuǧa şaqyrdy.
VI Düniejüzılık köşpendıler oiyndary 1-6 qyrküiek aralyǧynda Qyrǧyzstannyŋ Ystyqköl oblysynda ötken edı. 100-den astam elden sportşylar qatysqan būl saiysta Qazaqstan 74 medalmen, onyŋ ışınde 32 altyn jüldemen bırınşı oryn alǧan bolatyn.
"Qazaqstan osy ortaq ıske belsene atsalysuǧa qaşanda daiyn. Ekı bauyrlas elge ata-babalarymyzdyŋ qaldyryp ketken eŋ qūndy ösietı: būl – özara qūrmet jäne mäŋgı dostyq. Osy danalyqty ūmytuǧa eşqandai haqymyz joq. Bız – Ūly dala örkenietınıŋ zaŋdy mūragerınıŋ bırımız. Batyr babalarymyz ūlan-ǧaiyr jerdı bızge amanat ettı. Salt-dästürımızdı, ruhani qūndylyqtarymyzdy mūra etıp qaldyrdy. Qasterlı qazynany közdıŋ qaraşyǧyndai saqtap, jas buynǧa tabystau – ortaq paryzymyz. Osy ruhty boryşymyzdy örkeniettı, mädeniettı türde, abyroimen jüzege asyruymyz qajet", – dedı ol.
Prezident Qazaqstan maqsaty – biık, jospary – aiqyn, bolaşaqqa senımmen qaraityn ozyq oily ūlt retınde ärdaiym alǧa qarai ūmtylyp kele jatqanyn aitty.
"Bız, sonyŋ ışınde ūlttyq sportpen ainalysatyn jastar, basqa da sportşylar, memlekettık qyzmetşıler men käsıpkerler, därıgerler men ūstazdar, studentter men ǧalymdar, jūmysşylar men basqaruşylar, äskeri qyzmetkerler men mekeme qyzmetşılerı – bärımız mädeniettı, sabyrly bolyp, daŋǧaza men aiqai-şuǧa jol bermeuımız qajet. Sonda ǧana qazaq halqy tolyqqandy örkeniettı qoǧam bolady", – dep atap öttı Memleket basşysy.
