Resei Ukrainadaǧy soǧysty qazırgı maidan şebı boiynşa toqtatuǧa niettı emes. Būl turaly Reseidıŋ syrtqy ıster ministrı Sergei Lavrov 14 tamyzda «VGTRK» telearnasyna bergen sūhbatynda mälımdedı, dep habarlaidy "Adyrna".
Onyŋ sözınşe, Mäskeu qaqtyǧysty uaqytşa toqtatudan görı ūzaq merzımdı jäne tūraqty retteudı qoldaidy.
Lavrovtyŋ aituynşa, soŋǧy uaqytta soǧysty dereu toqtatuǧa şaqyratyn pıkırler köbeigen. Olardyŋ qatarynda Qazaqstan prezidentı Qasym-Jomart Toqaevtyŋ ūstanymy da bar. Toqaev şılde aiynyŋ soŋynda Resei prezidentı Vladimir Putinmen kezdesude Ukrainadaǧy qaqtyǧysty uaqytşa toqtatu mümkındıgın qarastyrudy ūsynǧan edı.
Eske salsaq, Qasym-Jomart Toqaev Qazaqstannyŋ beibıtşılık pen dialogty qoldaitynyn aitqan edı.
«Qazaqstan böten el emes. Degenmen türlı ūsynystarǧa qaramastan, men araaǧaiyn boludan üzıldı-kesıldı bas tartamyn. Öitkenı Resei – ūly memleket, al orys halqy – ūly halyq. Sondyqtan kün tärtıbındegı mäselelerdı Reseidıŋ özı syrtqy araaǧaiynsyz-aq şeşe alady dep esepteimın», – degen bolatyn Qasym-Jomart Toqaev.
Sonymen qatar Prezident Resei men Ukraina arasyndaǧy äskeri ıs-qimyldardy toqtatudyŋ maŋyzdylyǧyna toqtalyp, qaqtyǧystyŋ jaǧdaiy turaly aitqan.
"Būl jerde qandai da bır azamattyq soǧys turaly söz bolyp otyrǧan joq. Bız ukrain halqyna, onyŋ mädenietı men tılıne ärdaiym qūrmetpen qaradyq. Sondyqtan būl qaqtyǧystyŋ tabiǧaty köpşılıkke, sonyŋ ışınde bızge de tolyq tüsınıktı emes dep esepteimız. Mysaly, Äzerbaijan men Armeniia arasyndaǧy, onyŋ ışınde ūzaq uaqytqa sozylǧan qaqtyǧystyŋ mänı men şyǧu törkını bızge anyq edı. Öitkenı onyŋ tarihi sebepterı tereŋde jatyr. Al būl jaǧdaidyŋ mänın tüsınu äldeqaida qiyn", - degen edı Prezident.
Alaida Resei syrtqy ıster ministrı qazırgı bailanys şebınde atysty toqtatudy qabyldamaitynyn aitty. Lavrovtyŋ pıkırınşe, soǧysty toqtatu tek «ūzaq merzımdı, senımdı ärı tūraqty retteu» bolǧan jaǧdaida mümkın.
Sonymen qatar Lavrov Reseidıŋ soǧys jürgızu täsılderın qataŋdatuy mümkın ekenın mälımdedı. Ol Batystyŋ Kievke äskeri qoldau körsetuın toqtatuǧa baǧyttalǧan äreketterdıŋ küşeietının aitty.
Resei tarapy Qara teŋızdegı äskeri äreketterge moratorii engızu jönındegı Türkiia bastamasyna da oŋ jauap bergen joq.
Resei SIM ökılı Mariia Zaharovanyŋ mälımdeuınşe, Mäskeu 2022–2023 jyldary jūmys ıstegen «Qara teŋız bastamasyna» qaita oraludy orynsyz dep sanaidy. Onyŋ aituynşa, Resei Türkiiadan būl mäsele boiynşa resmi türde räsımdelgen ūsynys almaǧan.
Türkiia būǧan deiın Resei men Ukrainaǧa Qara teŋızdegı azamattyq kemelerge şabuyl jasamau jönınde moratorii engızudı ūsynǧan bolatyn. Ankara mūndai qadam aimaqtaǧy keme qatynasynyŋ qauıpsızdıgın qamtamasyz etuge mümkındık beredı dep esepteidı.
Kiev būǧan deiın qauıpsızdık kepıldıkterı bolǧan jaǧdaida soǧysty qazırgı maidan şebı boiynşa toqtatuǧa daiyn ekenın bırneşe ret mälımdegen. Al Mäskeu qaqtyǧysty uaqytşa toqtatuǧa emes, özınıŋ talaptaryn qamtityn ūzaq merzımdı kelısımge qol jetkızudı közdeitının aityp keledı.
Osylaişa, 14 tamyzdaǧy mälımdemeler taraptardyŋ soǧysty toqtatu şarttaryna qatysty ūstanymdary älı de aitarlyqtai alşaq ekenın körsettı.
Būǧan qosa, Resei Qorǧanys ministrlıgınıŋ Telegram-daǧy resmi arnasynda «Qysta senderdı “mūzdai qatyramyz» degen jazuy bar drondardyŋ suretı jariialandy. Ukraina tarapy būl jariialanymǧa jauap retınde Reseidıŋ mūnai öŋdeu zauyttaryna qatysty mälımdeme jasady.
