Aqtau qalasyndaǧy Ziiatkerlık mektepte «Caspian Startup-2022» halyqaralyq startaptar baiqauynyŋ qorytyndysy şyqty, dep habarlaidy “Adyrna” ūlttyq portaly.
2022 jyly dästürlı baiqauǧa Qazaqstan, Äzırbaijan, Özbekstan, Türkmenstannan 120-dan astam joba kelıp tüstı. Olardyŋ barlyǧy tabysty startaptardy qūru jäne ılgerıletuge, sondai-aq startap mädenietın qalyptastyruǧa, investorlar tartuǧa, ziiatkerlık menşıktı qorǧauǧa baǧyttalǧan.
Finaldyq turǧa qatysuşylar «Bolaşaqtyŋ mektebı», «Äleumettık mäselelerdı şeşu», «Turizm» nominasiialary boiynşa tabysty ömır sürudı qamtamasyz etetın IT-startaptardy ūsyndy.
“Jyl saiyn jobalardyŋ sany artyp keledı, olardyŋ ataulary avtorlardyŋ azamattyq ūstanymy men jahandyq jauapkerşılıgın rastaidy, sondyqtan bız «Caspian Startup-2022» baiqauyn äleumettık taqyrypqa arnadyq”, – dep atap öttı Aqtaudaǧy Ziiatkerlık mektep direktory Äsel Beisembinova.
Eŋ myqty avtorlar biznes, bılım beru, medisina, IT jäne basqa da sala käsıpqoilarynan ırıktelgen bedeldı qazylar alqasynyŋ aldynda öz jobalaryn qorǧady.
Alǧaş ret «Caspian Startup-2022» baiqauymen qatar Ziiatkerlık mektepter men Halyqaralyq IT-startaptar tehnoparkı ūiymdastyrǧan jaŋa jobasynyŋ qatysuşylaryn bırıktıretın Demo Day şarasy öttı. Üş ai boiy NIS oquşylary Astana HUB-ta onlain oqudan ötıp, tälımgerlermen bırlesıp öz jobalaryn äzırledı, keleşegı zor jobalardyŋ avtorlary öz jetıstıkterın körsetıp, qorǧau üşın Aqtauǧa keldı.
Demo Day alaŋynda Astana HUB ötkızgen şeberlık saǧattar toptamasy da sūranysqa ie boldy. Oquşylar bırınşı şeberlık saǧatta «Startap jäne tehnologiialyq käsıpkerlık degenımız ne?» saualy töŋıregınde bılım beru baǧdarlamalary keŋsesınıŋ aǧa menedjerı Nazira Izbasarmen bırge oi bölıstı.
“Men öz ortama, otbasyma oralǧandai boldym”, – dedı 2015 jyly elordadaǧy fizika-matematika baǧytyndaǧy Ziiatkerlık mekteptı bıtırgen Nazira.
Astana HUB jäne Ūlttyq ziiatkerlık menşık institutynyŋ qoldauymen Aqtauda ötken Caspian Startup baiqauynyŋ finaldyq tury qatysuşylary üşın auqymdy oqytu ūiymdastyryldy, interaktivtı sessiialar men master-klasstar biznes-kommunikasiialar, STEM-bılım, baǧdarlamalau, avtorlyq qūqyq, biotehnologiia, farmakologiia, balamaly energiia közderı, sondai-aq bügıngı zamannyŋ basty basymdyqtaryna arnaldy. Kriminalistikadaǧy zamanaui himiialyq taldau ädısterıne arnalǧan «Şerlok Holmstyŋ ūrpaqtary» atty josparly şeberlık saǧaty ülken qyzyǧuşylyq tudyrdy.
Ziiatkerlık mektepterdı damytu departamentınıŋ direktory Rustam Abilov pen Astana HUB-tyŋ basqaruşy direktory Jambyl Mahmetov qol qoiǧan memorandum NIS pen IT-startaptardyŋ halyqaralyq tehnoparkı arasyndaǧy tabysty yntymaqtastyqtyŋ qisyndy jalǧasy boldy.
«Dioth.tech» jobasyn qorǧaǧan Aqtöbedegı Ziiatkerlık mektep oquşysy Arman Jalǧasbaev «Caspian Startup-2022» halyqaralyq baiqauynda jeŋıske jettı. Mektep qabyrǧasynda respublikalyq ǧylymi jobalar baiqauy men fizika pänı boiynşa jelılık olimpiadalardyŋ bırneşe dürkın jeŋımpazy bolǧan Arman biyl Aqtöbedegı NIS-tıŋ üzdık oquşysy atandy.
Asanälı men Diasälı Kärım, Jarasar Däulet pen Dilnaz Taspulaeva qūrǧan Kökşetau qalasynyŋ jūldyzdy komandasy «Komek App» jobasyn äzırlep, ekınşı oryndy ielendı.
Qola jülde aqtaulyqtardyŋ enşısınde qaldy – Rahat Abatov pen Myrzaälı Asanov «Blind-Klavish» jobasyn mümkındıgı şekteulı jandardyŋ äleumettık beiımdeluıne arnady.
Demo Day alaŋynda ūsynylǧan jobalardyŋ ışınde Oraldaǧy NIS («WEST» komandasy: Adelia Şaukeneva, Ernūr Nasikali, Abylai Mametan, Almas Saparov, Azamat Orazǧali) pen Şymkenttegı ekı Ziiatkerlık mektep qūramasynyŋ («Colight» komandasy: Zinaenur İslam, Qadırjan Lutfullaev, Nariman İsaev, Aqbota Särsembekova) startaptary üzdık dep tanyldy. Astana HUB Demo Day jeŋımpazdaryna jobalaryn jüzege asyruda qarjylyq qoldau körsetedı.
Arman Jalǧasbaev, kökşetaulyq komanda jäne Aqtaudaǧy NIS ökılderı Diana Kuvanbai men Danil Muhalev («Robot-terapevt SenimPlus» jobasy) Qazaqstan-Britan tehnikalyq universitetınıŋ granttaryn ielendı. Sondai-aq üzdık joba avtorlaryna Safi Ötebaev atyndaǧy Atyrau mūnai jäne gaz universitetı men Şahmardan Esenov atyndaǧy Kaspii memlekettık tehnologiialar jäne injiniring universitetınıŋ granttary tabys etıldı.
NIS jäne Astana HUB-tyŋ jazǧy mektebıne Maŋǧystau oblysynyŋ 150-den astam oquşysy men mūǧalımı qatysty, olar üşın startap mädeniet jäne sifrlyq sauattylyqty qalyptastyru boiynşa treningter men şeberlık saǧattar daiyndaldy.
«Caspian Startup-2022» baiqauynyŋ qatysuşylary üşın Maŋǧystau öŋırınıŋ kielı jerlerıne ekskursiialar, psihologiialyq treningter, şyǧarmaşylyq şeberlık saǧattary men sporttyq oiyndar ūiymdastyryldy. Dastarhannyŋ basty asy äzırlengen bauyrsaq-pati biznes pen IT-salasynyŋ bolaşaq jūldyzdaryna jaŋa serpılıs pen quanyş syilady.
”Adyrna” ūlttyq portaly
