Astanada Bolat Atabaev týraly “Myń jyldyq oıyn” derekti fılminiń premerasy ótti, dep habarlaıdy “Adyrna” ulttyq portaly ulysmedia.kz saıtyna silteme jasap.
Fılmniń tusaýkeserine teatr jastary, óner salasynda bilim alyp jatqan stýdentter, marqumnyń týystary, sondaı-aq zııaly qaýym ókilderi de keldi.
Fılmniń avtory – jazýshy, jýrnalıst, dokýmentalıst Qanat Tileýhan. Fılmniń aty – «Myń jyldyq oıyn».
“2021 jyly Bolat Atabaevtyń 70 jyldyǵy edi. Soǵan oraı túsirse degen áýelde oı bolǵan. Biraq onyń reti bıyl keldi. Teatrdyń myń jyldyq oıyny áli jalǵasyp jatyr. Avtorıtarlyq júıeniń, dıktatorlyq bıliktiń sonaý Rım ımperııasynan bergi ımperatorlardyń halyqpen oınaýyna da myń jyl. Osy myńjyldyq oıyndardyń arasynda basyn tasqa da, taýǵa da soqqan rejısserdiń beınesin jasaýǵa múmkindigimizshe tyrystyq. Árıne, jańa Ermek Tursynov aıtqandaı Bolat aǵa eń birinshi kezekte sýretker. Bul teatrdyń qarsylyǵy, teatrdyń kúresi. Óner arqyly ol kisi óziniń sózin aıtqysy keldi. Erkindik, demokratııalyq qundylyqtardy dáriptegisi keldi”, – deıdi fılm avtory Qanat Tileýhan.
Eske sala keteıik, Bolat Manashuly Atabaev – rejısser, Qazaqstannyń eńbek sińirgen óner qaıratkeri. "Aqsaraı" teatrynyń kórkemdik jetekshisi.
Rejısser Qazaq memlekettik akademııalyq drama teatrynyń sahnasynda B.Rımovanyń "Qos munlyq", M.Maqataevtyń "Qosh, mahabbat" (1991), I.Orazbaevtyń "Shyńǵys han" (1994), Q.Ysqaqtyń "Jan qımaq" (1995), R.Muqanovanyń "Máńgilik bala beıne" (1996), Á.Kekilbaevtyń "Abylaı han" (1998), A.Chehovtyń "Shaǵala" (1998), M.Meterlınktiń "Soqyrlar" (1993), B.Brehttiń "Toǵyshardń toıy" (1999); sonymen qatar R.Muqanovanyń "Qaraly sulý" (M.Áýezovtiń shyǵarmasy boıynsha) spektaklderin kórermen nazaryna usynǵan.
“Adyrna” ulttyq portaly
