Jambyl oblysynda Bolat Nazarbaevqa qarasty bazar jerleri memleket menshigine qaıtaryldy, - dep habarlaıdy “Adyrna” portaly oblystyq prokýratýraǵa silteme jasap.
2004 jyly Qordaı aýdany ákimdiginiń jáne Qordaı aýyldyq okrýgi ákiminiń aktilerimen Bolat Nazarbaevqa tıesili «Qarasaı B.N.-Taraz» JShS-ne «Barys-2» saýda ortalyǵyna qyzmet kórsetý úshin 34,3017 gektar jer telimi berilgeni habarlandy.
«Ýchaske berilgen kezde onyń tártibi buzylǵan, atap aıtqanda aýdany 22,25 gektar jerdiń bir bóligi aýyl sharýashylyǵy maqsatyndaǵy sýarmaly egistik alqaptarǵa jatady jáne erekshe qorǵaýǵa alynyp naryqtyq qyzmet kórsetýge berilgen. Aýdan prokýratýrasy aýdan jáne aýyldyq okrýg ákimdikteriniń aktilerin, satyp alý-satý shartyn jaramsyz dep taný jáne kúshin joıý týraly talap aryzben sotqa júgindi», - delingen habarlamada.
Jambyl oblystyq sotynyń azamattyq ister jónindegi sot alqasynyń 2023 jylǵy 28 jeltoqsandaǵy uıǵarymymen «Qarasaı B.N.-Taraz» JShS men departamenti arasynda 2007 jylǵy 24 shildedegi No 81 jáne № 82 ýchaskelerdi satyp alý-satý sharttary jasalǵan. Qordaı aýdany ákimdiginiń jer qatynastary, sondaı-aq «Kordaı Invest» JShS-niń jer telimderin óteýsiz berý týraly barlyq sharttary jaramsyz dep tanyldy jáne kúshi joıyldy.
Sot úkimi 2023 jyldyń 28 jeltoqsanynda zańdy kúshine endi, jer ýchaskelerine memlekettik aktilerdiń kúshi joıyldy, dep qosty prokýratýra.
