Endi ońtústikten soltústikke kóshken qazaqstandyqtar men qandastarǵa óz kásibin júrgizýge kezeksiz 20 gektar jer beriledi. Bul týraly Kóshi-qon komıteti tóraǵasynyń mindetin atqarýshy Ilııas Ispanov aıtty, dep habarlaıdy “Adyrna” ulttyq portaly.
Ilııas Ispanlvtyń aıtýynsha, bıyl ońtústikten soltústikke 7 550 adam kóshken. Onyń 1 200-i – qandas, tek 76 adam ońtústikke qaıtqan.
“Soltústikten kóship ketken 33 adamǵa sol jaqtyń klımaty, al 30 adamǵa soltústikten tapqan jumysy unamaǵan. Endi bıyl soltústikke kóship barǵan azamattarǵa óz sharýashylyǵyn júrgizýge kezeksiz 20 gektarǵa deıin jer berý máselesi zań jobasynda tur”, - dedi Ilııas Ispanov OKQ-da ótken brıfıngte.
Sonymen qatar, ol buryn soltústikke kóship barǵan qazaqstandyqtar men qandastarǵa 40 sotyq jáne 1 gektar jer berilip kelgenin aıta ketti.
“Endi sharýa qojalyǵyn júrgizýge 20 gektar jer beriledi. Birinshi 5 jylda jer jalǵa beriledi. Eger 5 jylda ol ózi oılaǵan mejege jetip, kásibin damytsa, onda jer 49 jylǵa jalǵa beriledi”, - dedi basshy.
Búginde zań jobasy depýtattardyń qaraýynda jatyr.
«Ózgeris kúshine engen joq. Biz usynysty engizdik. Qazir zań jobasy depýtattardyń qaraýynda jatyr. Zań jańa jyldan keıin kúshine enýi kerek. Kóktemgi egis jumystary bastalǵanǵa deıin ózgeristi kúshine engizýge tyrysamyz», - dedi Kóshi-qon komıteti tóraǵasynyń mindetin atqarýshy.
