Qazaqstan Respýblıkasy Bas prokýratýrasynyń málimetinshe, 2022 jylǵy Qańtar oqıǵasy úshin 1396 adam sottalǵan, dep habarlaıdy "Adyrna" ulttyq portaly.
«Qańtar oqıǵasyn tergep-tekserýge jumystary áli jalǵasyp jatqanyn habarlaımyz, sondyqtan Qazaqstan Respýblıkasy Qylmystyq is júrgizý kodeksiniń 201-babynyń talaptaryna sáıkes aqparat jarııa etilmeıdi. Osy oqıǵalarǵa qatystylyǵy týraly jetkilikti dálelder alynǵan tulǵalar qylmystyq jaýapkershilikke tartylyp, búgingi kúnge deıin 1396 adam sottaldy», - dep habarlady Bas prokýratýra.
Jappaı tártipsizdikterge qatysqany jáne uıymdastyrǵany úshin 574 adam, onyń 12-si jappaı tártipsizdikti uıymdastyrǵany úshin sottaldy.
Sondaı-aq departament qaıǵyly oqıǵalar aıasynda 2960 qarý urlanǵanyn, onyń 1 myńnan astamy tabylǵanyn, qalǵan qarý-jaraq áli izdestirilip jatqanyn habarlady.
"Adyrna" ulttyq portaly
