«West Oil Software» kompanııasy 12 qańtarǵa deıin jumysqa oralmaǵan qyzmetkerler jumyssyz qalatynyn aıtty, dep habarlaıdy “Adyrna” ulttyq portaly.
«West Oil Software» JShS basshylyǵy kompanııanyń shyǵyny týraly málimdeme jarııalady. Kompanııa keltirilgen shyǵyndy 499 mıllıon teńgege baǵalaǵan.
“Oryndalýy múmkin emes talaptardyń qoıylýy nátıjesinde kompanııaǵa kún saıyn materıaldyq shyǵyn keltirilýde.
Búgingi tańda ereýilge qatysýshylardyń zańsyz áreketiniń saldarynan kompanııaǵa shamamen 499 mln. teńge zalal keltirilip otyr. Bul kompanııanyń qarjylyq jaǵdaıyna ǵana emes, ereýilge shyqqan jumysshylardyń otbasylyq bıýdjetine de áser etedi. Ereýil bastalǵannan beri osy ereýilge qatysýshylarǵa olardyń áreketteriniń zańsyzdyǵy týraly birneshe ret túsindirildi. Sonymen qatar arnaıy tehnıkalardyń kezeń-kezeńimen jańartý jumystary bastalǵandyǵy jáne jumysqa shyǵý qajettiligi týraly habarlandy. Kompanııanyń ereýilge shyqqan jumysshylarymen máseleni kelissózder ústelinde sheshýge shaqyrý áreketteri sátsiz aıaqtaldy. Jekelegen belsendiler mundaı bastamalarǵa tosqaýyl qoıyp, ereýildi toqtatqysy keletinderge barlyq talaptar jaqyn arada bizdiń paıdamyzǵa sheshiledi dep olardy jańylystyrý arqyly ustap otyr” dedi kompanııa basshylyǵy.
"West Oil Software" JShS basshylyǵy 2024 jyldyń 12 qańtarynan bastap zańsyz ereýildiń jalǵasýyna túrtki bolǵan qyzmetkerlerdi jumystan shyǵarýǵa nıetti.
Bul rette Qaraqııa aýdanynyń mansaptyq ortalyǵynda jumyssyzdyq boıynsha esepte turǵan azamattardy bos oryndarǵa jumysqa qabyldaý josparlanýda.
