Imam Ersin Ámire óziniń ýaǵyzdarynyń birinde trenıngter men kýrstar ótkizetin oramaldy koýchtardy “shaıtanǵa” teńedi, dep habarlaıdy “Adyrna” tilshisi.
Ersin ımam “oramaldy shaıtandar” otbasynyń buzylýyna tikeleı áser etedi dep pikir bildirdi:
«Sizdiń ata-anańyzǵa qurmetpen qaraýǵa tárbıelemegen bolsa, onda odan qaıyr joq. Onda eshqandaı jaqsylyq joq. Qazir, ókinishke qaraı, oramaldy taǵyp alǵan... Múmkin bul áńgime artyq bolar. Oramaldy shaıtandar deýge bolady. Ókinishke qaraı, sondaılar kóbeıip ketti. Oramal taǵyp alyp, toılarda sekirip bılep, qansha otbasylardy buzyp júr. Neshe túrli kýrstarymen, marafondarymen, basqalarymen áıelderge úıretip jatqan... Eger sondaılardyń sabaǵyna «toıyp alǵan, iship-jep, kekirgen kezde marafondarynyń, kýrstarynyń ıisi shyǵyp turǵan» qyz bolsa, ol jerden aıaq kıimińizdi qolyńyzǵa alyńyz da, qashyp ketińiz», – deıdi Ersin Ámire.
Imamnyń aıtýynsha, birneshe ret ajyrasqan nemese múlde baıǵa tımegen áıelder qazir «kúıeýińniń aldynda mindetti emessiń» dep, qyzdarǵa qalaı baqytty áıel bolýdy úıretip júr.
«Solardyń sabaqtarynyń saldarynan qanshama otbasy ajyrasyp jatyr. Ókinishke qaraı, tipti, qazir «menimen birge ýmraǵa, qajylyqqa júrińizder» dep, áıelderdi jınap, ýmraǵa qajylyqqa aparyp jatyr. Qazir oramalyna laıyq emes ápke-qaryndastarymyz kóbeıip jatyr. Solardy qansha otbasylardaǵy áıelder tyńdaıdy. Tyńdap alyp, kúıeýine kelip prava kachat etedi. Sharıǵatta mindetti, mindetti emes degen bólek másele, biraq biz – Orta Azııa halqy ózimizdiń qalyptasqan mentalıtetimiz, túsinik, salt-dástúrimiz bar. Múmkin basqa halyqtarda qartaıǵan ata-anasyn jeke qaldyryp, jeke ómir súre beretin shyǵar, bizde ol ata-anaǵa opasyzdyq sanalady», – deıdi ol.
Ersin Ámire óz sózinde joǵaryda atalǵan áıeldermen bas qosýdyń qajeti joqtyǵyn aıtady.
«Oramalda ma, demek ol oramalyna laıyq bolýy kerek. Ol Alla Taǵala úıretken, Islamdy úıretetin áıel bolýy kerek. Paıǵambarymyz (s.ǵ.s.) «Eger áıel bes ýaqyt namazyn oqysa, orazasyn ustasa, kúıeýine baǵynsa jáne ar-namysyn saqtasa, oǵan «qalaǵan esigińe, jánnatqa kir» dep aıtady deıdi. Mine, bul jerde kúıeýine baǵyný týraly aıtylyp jatyr», – deıdi Ersin Ámire.
