7 qańtar kúni «Almaty-Aqtóbe» baǵytyndaǵy jolaýshylar poıyzynda qyz bala dúnıege keldi. Tolǵaǵy kelgen áıeldi jolserik bosandyryp alǵan, dep habarlaıdy "Adyrna" ulttyq portaly.
"Qazaqstan temir joly" baspasóz qyzmeti habarlaǵandaı, jas ana Aınagúl Tileýbergenova Toǵyz stanııasynan Aqtóbe qalasyna deıin №33 «Almaty-Aqtóbe» baǵytyndaǵy poıyzymen jolǵa shyqqan. Poıyz brıgadasynyń qyzmetkerleri dereý qajetti sharalardy qabyldap, nusqaýlyqqa sáıkes poıyz mashınısin habardar etip, jedel járdemdi jaqyn mańdaǵy Jem stanııasyna shaqyrǵan.
Jedel járdem kelgenge deıin poıyzdyń jolserigi Ǵalııa Qabdrahmanova vagonda bosanǵan áıelge qajetti kómek kórsetti. Saǵat 14:27 mınýtta sábı dúnıege kelgen.
Jem stanııasyna kelgennen keıin náreste men anasyn jedel járdem qyzmetkerleri qabyldady.
"Men balamnyń ómiri úshin qatty qoryqtym. Alaıda, poıyz qyzmetkerleri maǵan osyndaı jaǵdaıda kómek kórsetip, janymnan ketpeı, aman-esen bosanýyma septigin tıgizdi. Bul kún bizdiń otbasymyz úshin esten ketpes sátterdiń birine aınaldy. Endi qyzym eseıgen kezde bul erekshe oqıǵany aıtatyn bolamyz", - dedi jas ana Aınagúl Tileýbergenova.
Ata-anasy náresteniń esimin Malıka dep qoıǵan.
"Adyrna" ulttyq portaly
