7 قاڭتار كۇنى «الماتى-اقتوبە» باعىتىنداعى جولاۋشىلار پويىزىندا قىز بالا دۇنيەگە كەلدى. تولعاعى كەلگەن ايەلدى جولسەرىك بوساندىرىپ العان، دەپ حابارلايدى "ادىرنا" ۇلتتىق پورتالى.
"قازاقستان تەمىر جولى" ءباسپاسوز قىزمەتى حابارلاعانداي، جاس انا ايناگۇل تىلەۋبەرگەنوۆا توعىز ستانتسياسىنان اقتوبە قالاسىنا دەيىن №33 «الماتى-اقتوبە» باعىتىنداعى پويىزىمەن جولعا شىققان. پويىز بريگاداسىنىڭ قىزمەتكەرلەرى دەرەۋ قاجەتتى شارالاردى قابىلداپ، نۇسقاۋلىققا سايكەس پويىز ءماشينيسىن حاباردار ەتىپ، جەدەل جاردەمدى جاقىن ماڭداعى جەم ستانتسياسىنا شاقىرعان.
جەدەل جاردەم كەلگەنگە دەيىن پويىزدىڭ جولسەرىگى عاليا قابدراحمانوۆا ۆاگوندا بوسانعان ايەلگە قاجەتتى كومەك كورسەتتى. ساعات 14:27 مينۋتتا ءسابي دۇنيەگە كەلگەن.
جەم ستانتسياسىنا كەلگەننەن كەيىن نارەستە مەن اناسىن جەدەل جاردەم قىزمەتكەرلەرى قابىلدادى.
"مەن بالامنىڭ ءومىرى ءۇشىن قاتتى قورىقتىم. الايدا، پويىز قىزمەتكەرلەرى ماعان وسىنداي جاعدايدا كومەك كورسەتىپ، جانىمنان كەتپەي، امان-ەسەن بوسانۋىما سەپتىگىن تيگىزدى. بۇل كۇن ءبىزدىڭ وتباسىمىز ءۇشىن ەستەن كەتپەس ساتتەردىڭ بىرىنە اينالدى. ەندى قىزىم ەسەيگەن كەزدە بۇل ەرەكشە وقيعانى ايتاتىن بولامىز", - دەدى جاس انا ايناگۇل تىلەۋبەرگەنوۆا.
اتا-اناسى نارەستەنىڭ ەسىمىن ماليكا دەپ قويعان.
"ادىرنا" ۇلتتىق پورتالى
