Prezident Qasym-Jomart Toqaev Mäjılıs töraǧasy Erlan Qoşanovty qabyldady, dep habarlaidy «Adyrna» tılşısı Aqordanyŋ baspasöz qyzmetıne sılteme jasap.
Memleket basşysyna Mäjılıstıŋ zaŋ şyǧaru qyzmetı turaly baiandaldy.
«Sessiia bastalǧaly berı 35 zaŋ qabyldanyp, Senatqa joldandy. «Ūlttyq qor – balalarǧa» baǧdarlamasynyŋ jüzege asyryluyn, sondai-aq jer qoinauyn paidalanu, biznes jürgızu, tälımgerlık pen balalardyŋ qauıpsızdıgı, densaulyqqa ziian keltıretın jūmys oryndarynda eŋbek etetın azamattardy arnaiy tölemaqymen qamtamasyz etu mäselelerın retteitın qūjattar qabyldandy»,—dedı Erlan Qoşanov.
Aituynşa, qazırgı uaqytta deputattardyŋ qarauynda 69 zaŋ jobasy jatyr jäne onyŋ üşten bır bölıgıne Mäjılıs deputattary özderı bastamaşy bolǧan.
Būdan bölek töraǧa biudjet kodeksı, halyqtyŋ tym köp nesie aluyn tömendetu, tūrǧyn üi saiasaty, memlekettık satyp alu, ǧylym jäne tehnologiialyq saiasat, tūtynuşylardyŋ qūqyqtaryn qorǧau, jylu energetikasy, mass-media, adam saudasyna qarsy ıs-qimyl jäne basqa da zaŋ jobalary boiynşa jūmystar jürgızılıp jatqanyn jetkızdı;
Memleket basşysy Mäjılıstıŋ 2023 jyly atqarǧan jūmystaryna oŋ baǧa berdı. Prezidenttıŋ aituynşa, qabyldanǧan zaŋdar halyqtyŋ tūrmys sapasyn arttyruǧa tıkelei yqpal etedı.
Qasym-Jomart Toqaev elımızdıŋ äleumettık-ekonomikalyq jaŋǧyru baǧdaryna qatysty negızgı şaralardy jüzege asyrudy közdeitın zaŋdardy qabyldau qajet ekenıne nazar audardy.
